Monday, March 23, 2009

انا

عدسة : احمد الصباغ




خليط من الليبراليه


مع حبة تدين


علي شوية رقص


علي كراهيه فظيعه للسياسه والسياسيين بشكل عام سواء حكوميين او معارضين


علي حبة اشعار كده بتاع خمسميت بتنجانه نفسهم يتلموا في ديوان بس مش عارفين


علي معلقتين غنا


نص كوباية عادل امام


كوبايتين ونص احمد ذكي


كوز من اليوسف شاهينيه


مع فرم كيلو من كتابات احمد خالد توفيق


ثم تخلط كل هذا لمدة 8 سنين


ثم تضيف ثلاثة كيلو جرامات من محمد منير ولوازمه


شوية افلام لشريف عرفه


وحط شوية نرفزه بس ما تكترش


علي حبة نحس واتوصي


كوبايتين بيض مضروبين في الخلاط والحدق يفهم


علبتين مارلبورو ابيض


وولاعه


جونتي هاف


مج نيسكافيه تقيل سكر زياده


شيشه تفاح


تحط كل ده في الفرن بس ما تطولش اوي


وماكينة حلاقة ( موسير الماني ) ليها اهميتها


مكيالين من الملل


نص شيكارة صبر


علي ربع شيكارة زهق


واستني لحد اما الخميره تخمر وتبقي تمام


طلع الصينيه اللي كانت في الفرن وحط عليها الخميره


وشوف كده هيطلعلك ايه ؟

34 comments:

حسام غانم said...

الله عليك

رغم إني مش بحب الجوانتي الهاف يعني

إنما كفاءة

مواطن مصري said...

يا سبحان الله احنا طلعنا زي بعض بس انا بحب النسكافية تقيل من غير لبن

:)))

بشربش سجاير

أسما said...

ايه يا عم الوصفة دي... ده صنف جديد نووووفي :)

سارة نجاتى said...

الله يخرب بيتك
بس كده

ما هو الأدب مش نافع

أنت يا ولد أنت بتتجسس عليا ؟

طب و الله بتتجسس عليا

أنت بتقابل نيرة و رضوى ؟؟

طب تعرف البنت اللى انا ناسيه اسمها اللى كانت قاعدة معانا و اللى هى قريبة نيرة برده ؟؟

قبل عيد الأم بيومين قعدت ما صحابى و قلت بالنص البوقين دول :

"أمى بتقولى امبارح أنا مشفتش زى الكوكتيل اللى فى بنتى ( امى بتقولها بتريقه طبعا )
يوم بتحفظ قرأن و تطلع منه على كنيسة.
يوم عايزه تروح كلاس هيب هوب , و يوم تروح ندوة , و يوم تفكر فى شعرها ( اللى على راسنا يعنى ) و يوم تشترك فى وحدة بحثية."
يعنى خليط متعرفلوش .

بس أنت عبرت عنه أحسن مما كنت أنا ح أعمل ميت مرة .
برافو عليك بجد و الله .

بس تفتكر بقى دى حالة طبيعية ؟؟ههههههه
الا قولى مالك عامل زى الهندوس كده ليه ؟؟ شلت شعرك ليه بس ؟

micheal said...

هههههههههههههههههههههه..ده أنت حكاية بقي
:)
بس بقولك إيه سيب معلقتين النحس دول عليا يا زكاوة
:)
أصل أنا المادة الخام يا حبيبي
:)
علي فكرة اطمن..أنا مطلق السياسة من زمان
تحياتي

الدرعمي said...

واااو .. دي وصفة هايلة بس طبق اليوم ده اللي أنا شفته ناقص تقوللنا إيه اللي هو بيميل ليه أكتر وتحب إنه يطغى ونعتبره الميزة الأساسية في الطبق ده !!! ربنا يوفقك يا زيكا انت ابن حلال وتستاهل الأكل ،، هنيالها اللي هتاكلك

اسماء عوني said...

كوكتيل عجيب وكله تناقضات
احلي حاجه فيه الرقص
وحلي حاجه انك مبطل سجاير بقالك فتره مش بطاله 12 يوم
والله يا زيكا براوف عليك عقبالي يابني

بس انت اتعلمت فين انك تخرج الحاجه من الفرن بعدين تحط عليها الخميره
مين الحلوه اللي طبختلك كده قبل كده
غلط
المفروض تحط الخميره في الفرن وبعدين تاكل

وعلي راي اخر تعليق عليك
هنيالها اللي هتاكل
حاكم انا من هذا المزنق اقدر اقول انك
طعم يعني
وحلوه الصوره دي
مش بعاكس لا مش بعاكس

مواطن مصري said...

انت كمان شكلك بتحب تو باك

:)))


اوعى تقولي بتحب يسري نصر الله
خالد يوسف او بتعشق ممثل اسمو باسم السمرة او هند صبري


او مدمن اغاني راب و خصوصا القديمة

Zika said...

حسام غانم
ليه بس يا مان مش بتحب الجونتي الهاف
عموما يا باشا يا انت تلبس الجونتي يانا اقلعه
واحد واحد
نورت يا باشا

Zika said...

مواطن مصري
ليه يا راجل ما بتشربش سجاير دي السجاير مفيده للصحه
جرب انت بس وادعيلي

امضاء
ابليس

Zika said...

isodle
لا يا فندم هوه موجوده بس انا معمولي
update
عشان انا نسخه اصليه
:))
نورتي

Zika said...

ساره نجاتي
تعالي اضربيني قلمين يا ساره تعالي
وعلي فكره انا ماعرفش نيره ولا رضوي
هو بس انا بعمل ايه
حاطط البلوره قدامي وقاعد وعمال اراقبك
خللي بالك بقي عشان انتي تحت المراقبه

هندوس
احم احم ايه الاحراج ده
هو اللي يحلق شعره في البلد دي يبقي هندوس
واهو هندوس ارحم من اي لقب ممكن تقوليه لو انا مطول شعري

Zika said...

سجل المزورين
الله يسهلك

Zika said...

مايكل باشا
وماله يا عم بص حط كوبايتين ميه علي الماده الخام دي وهتبقي اشطه
وانا كمان مطلقها بالتلاته
نورت يا نجم

Zika said...

الدرعمي
لا هو انت كده دوق وقولي رايك
ربنا يخليك يا باشا
هنيالها بقي

Zika said...

اسماء عوني
عقبالك وعلي فكره انا كده مبطل بقالي 13 يوم

كلي وانتي ساكته يا ماما غيرك مش لاقي
قولي الحمد لله
وبطلي معاكسه بقي شويه

Zika said...

مواطن مصري
ايه يا عم ده هو انا اللي مراقبكوا ولا انتوا اللي مراقبيني
بص انا بحب كل اللي انت قلت عليهم
بس الراب مش بسمعه غير
ايمنم
و جاي زي
وفيفتي سينت
وكاميليونير
وشوية شقلباظات تانيه كده

مواطن مصري said...

امنم ماشي يستمع انما عاوز تسمع راب سيبك من فيفتي سينت و اسمع القديم

جاي زي حلو بس اسمع موب ديب و ناسس و الحاجات القديم دة الراب الي على اصولة

thunder said...

هيطلع مصرى عايش فى مصر
الله عليك يا مخرج فعلا دا مصرى صرف بدون روتوش بجد بس بدل نص شيكارة صبر ياعم الاسمنت غالى زود انته كمان وخاليها شيكاررررررررررررة صبر
دمت بجد بكل ود وخير يا مخرج ((وش مبسوط اوووووى ))
ايوا كنت هنسة بلاش البيض يا منيل تيتتتتتتتتتتتتتتتتتتتت صوت من الرقابة

Unknown said...

مفيش معلقتين محمد صبحى؟؟؟

سارة نجاتى said...

هههههههههههههه
مش قصدى و الله ,
طب ايه رأيك و ده تصريح أول مرة أقوله

أنى لو كنت ولد والله لكنت عملته زيك

و مبحبش خالص اللى ولاد اللى بترتبى شعرها , هو الصراحة كل واحد حر يعنى مش ح نربط بين البنى ادم و بين شكل شعره

بس أنا لاحظت ان صحابى الولاد لما بيحبطوا يا بيحلقوا شعرهم
أو بيسيبوا دقنهم

يعنى بتبقى حالة استثنائية بالنسبة لهم
و ماشى يا عم البلورة أنت
ح تنفجر فى وشك ان شاء الله هههههههه

(اقفش بقه و قولى عايزه البلورة تنفجر فى وشى )

dr.lecter said...

ماله يسري نصر الله والله جدع وافلامه حلوه كييك

اسماء عوني said...

يا زيكا ازاي اكل وانا ساكته بس
حد يشوف العسل ده ويسكت بس
:D:D:D
ياض لما بشووف الصوره دي بحس اني عاوزه اقولك هات بوسه ههههههههههههههههههههههههههههه
وماتقوليش كلي وانتي ساكته دي تاني
ولا نسيت
يا بتاع الكشري بالمايونيز

Unknown said...

واد يا زيكاس.....اقولك حاجة غريبة؟؟
انت شبه صورة البروفايل على فكرة
طب والنعمة يا ابنى انت شبه الكائن اللى انت حاطه على صورة البروفايل
سلام

aMr saYed said...

مقاديركك ناقصة يا صديقي

على شويتين موز باللبن
و حبة سلة
على حزمة سمار طبيعي
و وئية حب الناس
كل ده اضربه في الخلاط هيطلعلك زيكا

يروح مديك بالقلم ونازل تاني في الخلاط

Zika said...

مواطني مصري
طب ما تبعتلي لينكات اغاني كده ولا حاجه وينوبك فيا ثواب

Zika said...

thunder
ايوه اجابتك صحيحه
استني بقي رقمك عشان تدخل المسابقه
ههههه
منور يا معلم

Zika said...

انجي
والله يا انجي هم مش معلقتين دول كوبايتين تلاته بس انتي عارفه بقي مش هيكفي نكتب المقادير كلها في بوست واحد ولا ايه ؟

Zika said...

ساره
والله يا ساره مش بيطلعلي دقن عشان احلقها اوعدك لو طلعت هاحلقها فورا هههههههههه
بس انا مش محبط ولا حاجه
انا مخنوق الحمد لله لسه ماوصلتش لدرجة الاحباط
هههههههههه
كده بارضه عاوزه البلوره تقفش في وشي هع هععع هعععععع

Zika said...

dr.lecter
وماله يا عم مانا بحبه بارضه انا قولت لأ
:D

Zika said...

اسماء عوني
شكلي هارفع قضية تحرش عليكي
والقضيه كسبانه ميه في الميه
بس بقي هنسيح لبعض يا بتاعة سجق مشوي ؟
ولا نسيتي

Zika said...

انجي
يا بنتي ماهو ده انا وانا صغير
بس برافو عليكي انتي اول واحده تلاحظش وجه الشبه
:P:P:P

Zika said...

فوووووووكس
ههههههههههه ليه يا عم الأذي ده
انت عارف انا مش بضرب حد
:D:D:D

Zika said...

انت تسال والكمبيوتر يجيب

الله يسهلك