Sunday, October 21, 2007

الشيشه والصيدليه

كان يا مكان , يا سعد يا اكرام , ما يحلا الكلام , الا بذكر النبي عليه الصلة والسلام
- عليه الصلاة والسلام-
في ارض مصر الحبيبه , في امبابه الحبيبه بالتحديد
كنت نازل اخد حقنة الفيتامين بتاعتي
من نوع
try(a) & try(B)
mix ben el etnen
وكل ما اروح صيدلية يقولي اسف مبنديش حقن
اكنها حقنة ماكس ولا حاجه
المهم
ماشي في ارض الله الواسعه والصيادله كلهم مبيدوش حقن وكلهم بيرتبوا الصيدلية ..
:@:@:@:@:@
اشمعنا دلوقت يعني
:@:@:@:@:@
انا عايز اخد الحقنه واخلص
:@:@:@:@:@
المهم اني لقيت يافطه مكتوب عليها صيدلية (( الراعي)) : قولت يارب يا مسهل :
وعلي باب الصيدلية لقيت واحد وواحده بيشربوا شيشه
انا قلت في نفسي ايه اللي مقعد دول قدام الصيدلية دي وبيشربوا شيشة ,
دخلت برجلي اليمين اعدت اتنحنح واقول احم احم
احم احم سلامو عليكو
يا جماعه
صوت التليفزيون شغال ( هاله سرحان مستضيفه عادل امام) يلا يا جماعه حد يرد عليا
لقيت الست اللي كانت بتشرب شيشه بره داخله بتتمشي كانها خارجه من الحمام
( يا خارجه من باب الحمام وكل خد عليه خوخه )
ايوه عايز حاجه ؟
( علي اساس يا فالحه اني كنت داخل بيتكوا بطلب حسنه )
هو حضرتك اللي هنا؟
اه
اؤمر
والله كنت عايز اخد حقنة تر
لا مبنديش حقن
طيب شكرا .... بقول حضرتك .
افندم
هو حضرتك الدكتوره اللي هنا
لا والله انا بشتغل مع الدكتور اللي اعد بره ده
اللي بيشرب شيشه ؟
اه فيه حاجه ؟
لا متشكر
سلامو عليكم
وعليكم السلام
.............................................................
الاول
الاتنين كانوا شايفني داخل الصيدلية ومحدش دخل ورايا ولا التفت لي لدرجه اني اتاكدت انهم مش تبع الصيدليه اصلا
ثم اني متوقعتش ان اللي شغالين في الصيدلية نفسهم يكونوا بيشربوا شيشه ..او علي الاقل مش قدام الصيدليه
هي قهوه ولا صيدلية
ثانيا
طريقة كلام الاخت اللي كانت واقفه ..طريقة واحده بتشتغل مع سواق ميكروباص..مع احترامي لسواقين الميكروباص يعني
ثالثا
انا لما بدخن قدام اي حد من صحابي او اي دكتور من اللي بتعالج عندهم للقولون او لضهري او اي حد بيقوللي ان السجاير مضره
وانا متاكد من كلامهم وبحاول ابطل
وباخدهم قدوه باعتبارهم اهل الذكر
(واسالوا اهل الذكر ان كنتم لا تعلمون)
انا عن نفسي علاقتي مع اي دكتور او صيدلي سواؤ كان صاحبي او مش صاحبي
بتبقي علاقة واحد مش فاهم اي حاجه في موضوع مع واحد فاهم كل حاجه في الموضوع
يعني باخد كلام الدككاتره ثقه
ومن هنا كانت الناس بتقول ان الدكاترة والصيادلة هم القدوه للبني ادمين عشان يحافظوا علي صحتهم
طب تخيلوا
بالله عليكم لتتخيلوا
تخيلوووووووووووووووا
صيدلي اعد معاه واحده وبيشربوا شيشه علي باب الصيدلية
لولا اني عارف ان فيه صيادله كتير هنا ولو قلت حاجه ممكن اخد طوب للصبح
كان زماني قلتكلام كبير
كلام كبير من الكلام اللي هو
:D

8 comments:

lonlysmily said...

ياسيدى سيب الناس تظبط دماغها
ولا بقت بتفرق بين دكتور ولا حنطور
كل عايز يظبط الجمجمه

واه على الفكرة مقولتش انت خدت الحقنه ولا لأ

Zika said...

lonlysmily
علي رايك
....
لا انا مخدتش الحقنه ...انا الشيشه بتاعة الدكتور عملتلي دماغ

sa'7so'7te said...

ايه يا ممدوح
بأة انا اغيب يومين عن البلوجات واصحابها يومين ارجع الاقيك بتقولى ماتكتبيش خالص مع انى بأيت اكتب عربى و انت اللى بأيت تكتب فرانكو "mix ben el etnen"

و الموضوع التانى بتشتم فى الصيادلة
مش كده يعنى . واحدة واحدة عليا يا مرسى
:)
حبة جد بأه
الاول الف سلامة عليك
تانيا انت عندك حق و الله فاللى بتقولوا
وانا اكتر حاجة اكرهها ان حد يقلل من مكانته فى نظر الناس و نظرى خصوصا انه تعب كتير عشان يتقال عليه دكتور
و رغم كدة حسسنى انه بقال مع احتلرامى للبقالين
بس ماتضايقش الواحد بيشوف من ده كتير
و تحياتى ليك
سلامو عليكو

Zika said...

sa'7so'7te
وعليكم السلام ورحمة الله وبركاته
الله يسلمك
لا والله انا مش بقول متكتبيش خالص انا بقول يعني تكتبي زي مانتي عايزه وفنفس ذات الوقت احافظ انا علي عيني
:)
مين ده بس اللي شتم في الصيادله
انا عارف انتوا كتير هنا والكتره تغلب الشجاعه
:)
...................
تحياتي ليكي انتي كمان
عليكم السلام

Layla said...

ههههه...واضح انك ما اخدتش بالك من الشبه الغريب بين شعار الصيدلية وبين الشيشة

:DD

شد يا معلم

Zika said...

MARVEL
ازيك يا مارفل عامل ايه
تصدق انا كان لسه فدماغي الحوار ده
فعلا فيه شبه مريب اوي
صباح الخييييير
:D

loza said...

اولا الف سلامه

تصدق احنا كمان كنا بناخد كلام الصيادله على انه ثقه


بس دلوقتى فهمنا الى فيها
لاننا مش فاهمين اى حاجه فيها

احم شكلى كده هكتب فوازير قريب

انا قصدى اننا كنا فاهمين انهم عارفين كل حاجه
بس لما دخلنا ولحد دلوقتى
ولا نعرف حاجه عن البطيخ

Zika said...

loza
احم احم
انا كده نسيت انا كنت جاي هنا ليه
:)
.................................
بس عموما انا فهمت ان انتوا كنتوا فاهمين ان الصيادله فاهمين كل حاجه وبعد ما دخلتوا صيدله والمفروض انكوا تبقوا فاهمين كل حاجه انتوا غيرتوا رايكوا لان انتوا صيادله ومش فاهمين كل حاجه
طب لما انتو متفهموش كل حاجه
انا لما احب اشتري دول اروح لمين
:D
للسوبر ماركت
تحياتي