ساعات الواحد بيمشي في الشارع مع نفسه ... المواصلات زحمة والتاكسيات مبتروحش امبابه ..ليه معرفش؟
يقوم الواحد بكل بساطه وبكل برود وبكل كل حاجه ياخدها مشي ..احسن وبدل وجع الدماغ والحر والزحمه
انا بعمل كده
وفليله من ذات الليالي ..وفي ارض الكيت كات المجيده
اكرمني الله عز وجل ..بسواق تاكسي ابن حرام مصفي
امبابه يا اسطي
بس هاخد 20 جنيه
نعم؟..ليه حضرتك يعني ..ده حتي النهارده الطريق فاضي
لا معلش والله انا بقولك الرقم ده من الاخر
لا يا اسطي ..اتفضل سكتك خضرا
........
ماهو انا مبحبش حد يستغلني
.......
بعديها بحوالي ربع ساعه وبعد حرق كام دقيقه من عمري وحرق صدري بكام سيجاره
بعث الله بتاكسي اخر من حيث لا احتسب
امبابه يا اسطي
ايوه ..هتدفع كام؟
لا اله الا الله......انت عايز تاخد كام يا اسطي؟
هاخد منك يا سيدي عشان شكلك واقف بقالك كتير25 جنيه ..وخليها عليا
بس يا اسطي ..انا بروح كل يوم من امبابه لجامعة القاهره ب 8 جنيه ولو الدنيا زحمه بدفع 10
لا والله يا برنس ..ده كان زمان
زمان ايه يا اسطي ..أنت هتستعبط...مانا روحت الجامعه النهارده
اتكل علي الله يا اسطي ..طريقك اخضر
........
ايه يا عم ..هو انا جاي من الهند
ولا هو الفيل اللي راكن تحت بيتكوا ده بتاعي
............
" ملحوظه "
الطريق بين الكيت كات وامبابه ...
حوالي اتنين تلاته كيلو وكلام بسيط
.................
وبعديها بساعه ...وبعد ما خلاص ..صدري اتحرق من السجاير ..وعيني وجعتني من البص في الساعه
ورجلي نملت من الوقفه وايدي واكلاني عايز اضرب حد وظابط المرور ماشلش عينه من عليا ( عرفت ليه بعد كده) والناس عماله تبص عليا كاني عامل عامله..او بيدوروا علي مشتبه به
او يمكن انا مثلت في التليفزيون وانا مش واخد بالي
.................
رزقني الله بتاكسي اخر...ياااه
امبابه يا اسطي
وحضرتك هتروح امبابه ليه؟
ساكن هناك بعد اذنك
لا مؤاخذه يا باشا ..مبروحش امبابه
..................
يا لهوي....هم لغوها يالهووووي
شالو بيتنا ...يالهوي انام فين انا النهرده
.................
لو مكنتش راجع من ماتش كوره ..كان زماني خدتها مشي
........
ان الله مع الصابرين
.........
وفجاه لقيت سواق تاكسي بيرمي عليا ..
شاورتله بسرعه
امبابه يا اسطي؟
اتفضل يا مان
يااااااه
اخيرا
( يا عنيا يا قلبي جرا ايه..الدنيا احلوت كده كده ليه)
( لما تلاقي الجد في ايده حفيده والناحيه التانيه السبحه في ايده ..يبقي انت اكيد اكيد في مصر)
يا اصحابي يا اهلي يا جيراني ..انا عايز اخدكوا في احضاني
...........
غريبه..الراجل متكلمش في فلوس
يلا كويس
بالمناسبه
انا ماكنش في جيبي غير 25 جنيه
المهم
تليفوني رن
ودايما تليفوني بيرن في اوقات مش تمام
واحد صاحبي..كندي
hey man .wuss up?
yea puddy ..u too
وطبعا بقيت المكالمه متخصكوش
السواق اتلخبط وبصلي وفضل مركز معايا من اول المكالمه
لحد
alsalamo 3alykom
شوية وبصلي وركز معايا
في حاجه يا اسطي؟
هو النجم مصري؟
اه ان شاء الله..بتسال ليه؟
لا بسال بس
هو انت اي حد بيركب معاك بتساله علي جنسيته؟
لا اصلك شكلك مش من هنا
يمكن
شوية ...وجالي تليفون ..من المدام في لبنان
وعلي سبيل الفكاهه مش اكتر
بدات كلامي ..بكيف حالك؟...
ورميت كام كلمه لبناني كده في النص
علي سبيل الدعابه المنيله با رضه
السواق ابتسم ابتسامه مريبه
المهم
وصلنا امبابه ..بالسلامه
وانا بكل زوق طلعت حوالي 6 جنيه كنوع من المجامله لانه وقفلي
بص السواق باستغراب شديد
حضرتك ايه دول؟
فلوس يا اسطي.ايه مبتعرفش تعد
لا والله بس دول قليلين جدا
نعم يا اسطي؟ ده انا بروح الجامعه ب 8 جنيه..هو فيه ايه النهرده؟
معلش يا باشا ..انا هاخد 10 جنيه
اللهم اني لا اسالك رد القضاء ولكني اسالك اللطف فيه
ماشي يا اسطي
خد
;)
ومشيت وانا بفكر...ايه اللي خللي سواقين التاكسي عايزين يستغلوني كده
وحطيت النقط التاليه واسيكم انتوا تقولولي اي حاجه
1- صابغ شعري اخضر
2- يمكن عشان مسقط البنطلون( مظنش بارضه..الشباب كلهم بيلبسوا زيي)؟
3- ولا يمكن عشان لابس (جونتي) هاف ( لا لأأ ماظنش) ؟
4- ولا يمكن عشان حاطط سماعات في ودني وبسمع اغاني( طب وايه يعني ما كل الناس وصلها الاختراع ده ) ؟)
5- ولا يمكن لما اتكلمت انجليزي شكوا فيا
6- ولا يمكن لما رميت كلمتين لبناني( قالك ده عربي ولازم نضحك عليه) ؟
كل الحلول دي بتثبت حاجه واحده...ان السياح بيتقلبوا في مصر بلدنا
وواضح اني كنت سايح اليوم ده
والسؤال الوجيه بقي... ايه اللي يخللي سايح يروح امبابه ؟
يمكن علشان يشوف الاهرامات ولا برج القاهره ولا نفسه يشوف معبد الكرنك ولا ايييييييه
يا ايها السياح ..اياكم وان تزرووا القاهره..وان زرتم متجوش امبابه بالله عليكم
................
حاجه غريبه ..حاجه غريبه.. حاجه غريبه ..الليل ده كله كان امبارح بيزيدني حرمان وقسيه .اتغير لييييييييه اتغير ليييه
انا كده هيست
كفايه كده
واعيش واخد غيرها
8 comments:
ههههههههههههههههههههه
فكرتنا بينا و احنا بنتخانق مع التاكسى جنيه ولا جنيه ونص ولا 2 جنيه بالكتير
دا انت تلف شبين كلها و تديله اتنين جنيه يظأطط بيهم
تعالى اسكن هنا احسنلك ياابنى
وبعدين حد يصبغ شعره اخضر؟!!!!!!!!!
شوية الارقام دى هتخلينا ناخد عنك انطباع تانى خالص غير اللى كنا راسمينه
;)
هاهاهاهاهاها
مافيش مرة ادخل هنا الا و اطلع مسخسخة"اكتر ما انا"
بس فعلا ايه المبالغ دى بعيدا عن ان زى مابتقول بريك ان احنا هنا اخرنا 2 جنيه
فحتى لما بنسافر طنطا بندفع جنيه و نص
و لما تتلعبك اوى و ناخدها من طنطا لشبين فى تاكسى يبقى 20 جنيه و فل اوى
و بعدين مش عارفة ليه انا النقط اللى انت قلتها غير الصورة اللى متخيلاها تمااما
و بعدين ما كنت تكنسل على الكندى ده حبكت يعنى ترد
break
يا سلااااااااام
واضح ان شبين دي حاجه كده تحفه
ايه الارقام الجامده دي
جنيه وجنيه ونص واتنين جنيه
بحب اسمع الارقام دي اوي
هههههههههههه
................
اه وماله
فيها ايه لما اصبغ شعري اخضر ماهو المهم انه يكون لايق عليا
وطالما لايق عليا وعاجبني ..يبقي مفيش اي حاجه غريبه
:)
مش عارف ايه حكاية الفكره اللي انتوا واخدينها عني دي
:D
sa'7so'7te
يارب يا سخسوختس تسخسخي اكتر واكتر وتبقي مسخسخه دايما كده يارب
:D
المهم
المواصلات عندكوا ..واضح انها مريحه لدرجه غريبه
اوعدنا يارب
.......
مش عارف انا ايه التخيلات بتاعتكوا دي بس واضح انها مش انا
يعني انا مش انا
يمكن تشابه اسماء ولا حاجه
:DDDDDDDDD
مينفعش اكنسل علي صحابي
وبعدين ماهو مش بيتصل كل يوم بارضه ولا ايه؟
على فكره ياظوظو احنا كنا دافعين 25 مش عشرين:D
ويوم م اخدنا ميكروباص الجلاء كان ب 45
بصراحه انا لو كليتى كده كنت هلم صحابى ونقسم الفلوس على بعض:D
loza
يعني انا الم صحابي في الكام يوم اللي بنزل الجامعه
هو انا بنزل الجامعه كل يوم عشان اخد صحابي معايا كمان
:D:D
هههههههههههههههههههههههههه
إسمع بقي المسخرة إللي حصلت معاية
انا من البلد إللي في ديل الخريطة, يعني لو إحنا بنقول اللتخلف بيقل كل ما تقرب من العاصمة, يبقي إحنا هنا بسم الله ما شاء الله معقل و منبع الوساخة إللي في البلد
شعب في الطرااااوة ....عايشين في أيام الخديوي مش الملك (حاسس شوية و هانلبس طرابيش و ساعات بكاتينة )
المهم:
أنا مش ماربي في البلد العقيمة دي زو الحمد لله ,و شلتي بتتكون من صفوة الشباب المحبطين في البلد إللي برضو و الحمد لله نفدوا من تطعيمات جرعة الغباء إللي بتتوزع عالمواطنين هنا و هم صغييرين
بصفة عامة إحنا في البلد بتاعتنا, بنعد مصدر قلق للمواطنين ,لأن لبسنا بالنسبة لهم لبس الفريق القومي لمنتخب المريخ(و خلي بالك إن المريخ هنا المريخ الكوكب مش المريخ السوداني)
الحاجة التانية بقي, ثقافتنا بصفة عامة ...كلنا زي غيرنا كتير في البلد دي بنتكلم لغات (إنجليزي ,أسباني,إيطالي ,ألماني) عادي الكلام دة هنا ...بس سبحان الله معانا بقيت عجبة ,
انا حصل عاية موقف هايثبت لك عبقرية المواطنين و خاصة جهابز الأمن المركزي في بلدك
في أول أسبوع ليا في الدراسة في سنة تانية في كليتي, كنت نازل من القاهرة بعد نهاية الصيف, و كان ساعتها اللبس القومي للشباب في القاهرة يعني
البنطلون بارمودة أو فيشر, التي شيرت باجي, الشراب هاف
و ياسلام لو فيه كاب واد ولا أيس كاب علي قرعتك تبقي روشت
نزلت من القاهرة بطقمين من دول و نضارة سبور ...إبن عمتي من ضمن شلت القلق بتاعتنا و واد شيك طحن, بس شاف إللي انا جاي بيه قال لي وربنا أنت هاتتزف في قلب البلد
قلتله انا مخالف البشر دة لو في بلنا العتية دي بشر أصلاً
نزلت و كنت عابل شعري سبايك و كنت لابس نيجر زي ما الكتاب بيقول
و ساعتها كان لسة الـ
إختراع CD Player :D
دة حاجة قبل الـ
ما ينزل MP3
شديته في الجيب الوراني
بص اللي حصل ما يتحكيش,
مشهد السوق:
سوقنا سوق سياحي , تحس إن الناس هنا بتاكل خشب و أنتيكات ولا بفطر بحجر
السوق كله مفيهوش محلين سندوتشات و الباقي كله بازارات
و انا ماشي في حالي و مشغل
Linkin Park
و عايش مع نفسي ألاقي لك واحد مقرب عليا , أول حاجة حدف كلمتين أسباني و مفهمتش عايز إيه شوية قلب إيطالي و بعدين هندي رمي كلمة ألماني إستوعبت
فهمت إنه عايزني أشتري(انا إتصدمت فمخي وقف الموقف شديد يا أخوانا و الله )
قمت قلت وحياة أمك لأركب هلسك بصيت له بصة غبية و بصيت عالمحل بتاعه و مشيت معاه و هو شغال و انا ولا انا هنا و قام شوية و قلت له
معلش انا مضطر أمشي انا إتأخرت عالكلية
بصراحة الراجل كان هايتشل ,كنت هاضحك بس قلت كويس إنه سابني أمشي :P
مشهد الكورنيش:
انا ماشي عالكورنيش نسيت خالص إن فيه مدرسة بنات هناك, و عديت و بحظي المنييل الثانوي كانوا طالعين بدري , الحمد لله عناصر الأمن في مصر قمة في العبقرية شافوني معدي هناك و حاسيتهم هايقوموا يأمنوا لي موكب عشان أعدي في حشود البنات دي, انا مش بكلم بنات بطبيعتي و الحمد لله النظارة كانت مدارية فضايح
انا شفت مناظر علي وشوش البنات حسيت فعلاً بالحرمان في البلد دي,
اللي تبص و تجيري واللي خادني من وشي لقفاية و اللي بصت و تضحك و أللي تيجي تقول هاي و تجري
أاااااه ياللهوي عالتخلف.....
مشهد الكلية:
أولاً لقيت طابور طويل عشان الكارنيهات , و بمنتهي البجاحة إللي في الدنية كسرت الطابور وو رحت داخل و المفاجئة إن مافيش عسكري من حرس الجامعة ولا الأن المركزي عقب ولا فكر يكلمني وكلهم إكتفوا بالفرجة
دخلت الكلية, المصيبة السودة بقي
شلتي في الكليه عتيها طحن مافيهمش غير 2 و هم بس إللي عرفوني بعد عذاب
دخلت لقيت الشلة عالكريتة المعتادة بتاعتنا و البنات قاعدين والولاد عاملين فيها جينتل و واقفين (كله منظرة طبعاً)
قنت قاعد في قلب الكريتة في مكان فاضي
طبعاً انا البنات بصولي بصة غبية طحن و كله سكت و الولاد المعاتيه كامنوا جايين يضربوني
قمت قالع النضارة قلت يارب حد يفهم انا مين
برضوا مقيش فايدة
مرة واحدة زميلتي اللبني أدمة اللي بتفهم فيهم ضحكت و قامت واقفة قصادة كانت هاتقع عالأرض
كله بص لي بتناعة و الغباء بطق من عنيهم
و مرة واحدة واحد فيهم نطق و هو شاكك برضو
انت....أحمد ؟
فطست علي روحي من الضحك و قمت سايبهم و ماشي عالكفيتيريا لقيت لك القبيلة ...قصدي الشلة يعني في ديلي
و إشتغلوني بقي
إيه اللي عامله في روحك دة؟
كدة انت تتخطف
يا ابني ما تعيشش الدور
ممكن تسلفني البنطلون ؟
و المصيبة الكبيرة بقي في الدكاترة
دكتور ما شاء الله علي عقلة ,بعت لي الفراش بتاعه عشان شافني من شباك مكتبه (راجل فاضي قمة الهيافة)
سحبني عالمكتب و أما عرف إني طالب سمعت كلام في الغزل عني ماقلوش عنتر في عبلة
إتمسح بياا بلاط مكتبه (الحمد لله إن منزليش في الحرم تحت كانت هاتبقي فضيحة بجلاجل)
قعد يقل لي
-انت فاكر نفسك في الجامعة المريكية هنا؟
(حسيت الجامعة الأمريكية حتة قبييحة ولا كباريه من بتوع شارع الهرم و ربنا)
-انت في مكان محترم, مكان مقدس
(حسيت إني هاقلع الشبب ولا الجزمة و أتوضي قبل ما اخش مكانه المحترم دة )
-إنت من فين ياد ؟
(ستووووب....هنا بقي و كنت هابدأ اخرف له)
أهم درس إتعلمته , إنك ممكن بسبب مظهرك في بلد متخلف تعامل معاملة ملوك و تحس بأدميتك لأول مرة
لأن الشعوب المتخلة خالباً ما تتاخد بالمظهر و ليس الجوهر
7amada-zorpia
حماده باشا
هههههههههههههههههههههههههه
ايه يا عم المسخره دي
وحبيبي ... كمان بتسمع linkin [ark
والله انت راجل صح الصح وكبدتك دي صح الصح
::D:D:D:D:D :P:PP:P:P:P
والله يا باشا الكلام ده مش غريب عليا مش عارف ليه
ههههههههههههههه
بتفكرني بنفسي لما بصبغ وانزل الجامعه
مش عارف اقولك ايه
الحال من بعضه
هههههههه
نورت المدونه يا باشا
بس مش كنت تقول يا راجل
كنا فرشنالك المدونه رمل وتراب وزلط وحاجات من دي
:D:D
نورت يا حبي
سلام
Post a Comment