طريقة عمل الطحينة

هو انت  ليه وانت صغير لما قالولك ان الشيطان عصى أمر ربنا قام ربنا عاقبه وهايدخله النار , مافهمتهاش ليه من أول مره , ليه قعدت تقاوح وتقول طب ليه مايتصالحوش ؟!

ده يبوس راس ده وده يبوس راس ده وخلاص وشكرا على كده

وبما ان ربنا الكبير يبقا الشيطان هو اللي يبوس بس 

وربنا يسامحه 

ونعيش مع بعض كلنا 

ليه فضلت تعذّب أبوك الغلبان اللي ماعندوش اجابات أكتر من الفلوس اللي بيطلعها رغم انها مش كتير عشان يديهالك تعمل بيها أي حاجه تلهيك عن السؤال

يمكن ماكانش بيرضا يجاوب عشان مايعرفش ويمكن كان خايف يقولك .. ويمكن ماكانش وقته ..

ماكانش وقته بمنتهى البساطة من غير أي فلسفة 

 مادرتش بالدنيا وبالسؤال غير لما كبرت ولقيت مقلة " نور الاسلام " معلقة صورة كبير لحازم صلاح أبو  اسماعيل ومكتوب عليها " سنبايعه " وافتكرت وانت صغير لما كنت مش فاهم الدرس اللي فيه قصة بيعة الرسول

وسألت الأبلة بمنتهى السذاجة 

" وهم يبيعوه ليه يا أبله "

- لأ يا حبيبي يبايعوه يعني ينصروه

- عشان ايه 

- عشان هو نبي يا حبيبي هو سيدنا محمد اللي ربنا بعته عشان يهدينا 

وساعتها يقوم صاحبك اللي دايما حظه أحسن منك يسأل سؤال يخليك ترجع تاني للضلمة ووتخلص صحوبيتك القصيرة مع سبوت النور

- أبله أبله هو ربنا فين ؟

السؤال اللي خد منك الأبله والتلاميذ وماخدش منك سنين

لكن خد من أبوك وقت كبير وتفكير أكتر لما عرف انك وقفت في نص الفصل وسبوت النور راجع عليك ومعاه عينيهم كلهم والأبلة بتسألك

- تفتكر ربنا فين ؟

فترد عليها بكل سذاجة 

- ربنا ليه ؟

يمكن دلوقت عرفت ربنا ليه .. لكن ماعرفتش ربنا فين ... وأكيد صاحبك ماعرفش والأبلة كمان ماعرفتش

لكن غالبا كلكوا اتفقتوا ان مش مهم ربنا فين منّي .. الأهم دلوقت .. أنا فين من ربنا

يمكن اتأكدت - رغم ان ده زعّلك جدا - انك مش هاتشوف ربنا دلوقت ومطلوب منك تعمل حاجات كتير أوي عشان تشوفه

وانت عارف انك نفسك تشوفه عشان تتكلم معاه كتير أوي وتسأله على كل حاجه وتحكيله على كل حاجه حصلتلك وتشتكيله منهم كمان

يمكن ساعتها مش هاتفرق دموعك معاك .. لكن هاتفرق معاه

وهاتحس بقيمة الطبطبة اللي حرمك منها طول حياتك

لأنك كنت طول الوقت لوحدك .. وكنت طول الوقت لوحدك لأنك كان حواليك ناس كتيرة أوي

يمكن ماكانوش بيعرفوا يطبطبوا عليك

أو يمكن مش هي دي الطبطبة اللي انت كنت محتاجها

تقطع ظنّك اللي بيسيبك ساعات ويسهيك عن كل حاجه انت ماقدرتش تعملها مش بس لأنك ماقدرتش تعملها

لكن كمان لأنك نسيت

فتفتكر على اخر لحظة نصيحة أمك اللي من كتر ما بتحضنها وانت حاسس بالعجز انك مش قادر تضحكها

مابقتش تعرف تحضن

وتفتكر صوتها وهي بتقنعك ان الطحينة لازم يتحط عليها شوية خل

وانت كل مره وكأنك قاصد

بتنسى الخل .. فتبوظ الطحينة