Tuesday, April 17, 2012

بيت زغير بكندا وكارت شحن بعشرة


  تقرر تسأل نفسك ايه الحل , يمكن انت مش عارف الحل , أو يمكن عارفه وبتستعبط ومش عايز تعترف لنفسك انك عارف 
حتى ظروف حياتك اللي خلتك تحب تركب ميكروباصات وتكره 
الزحمة وتشحن كارت بعشرة وانت معاك تشحن بأكتر


نفس الأسباب اللي خلتك تحب القاهرة بالزحمة والوساخة والأحلام البسيطة اللي كلها مش على مزاجك لأنها بتحتل جزء كبير من الفراغ اللي بيملا عليك الدنيا وتخليك تتنازل عن حلمك الكبير , بيت زغير بكندا 
وكأن فيروز صوتها ماكانش بيقول كل حاجة
أو قال حاجات انت بتحاول تشوفها مملة وتجبر نفسك تتخيل انك لوحدك في بيت زغير في كندا والتلج والعصافير البردانة اللي بتحوم حوالين بيتك عشان تتدفى فيك
وكأن الكمانجات نفسها ماعادتش بتدوس على مشاعرك أوي
مش بس لأنك حبيت الكونجا والبونجز والدف والطبلة أم طبقة زرقا مرسوم عليها نجمة كبيرة
وانت عارف ان لونك أجبرك على حاجات كتير أوي
جسمك القليل أوي مافرقش مع الناس الكتير اللي باستك .. حاجه كده زي رغيف العيش اللي وقع على عشرين واحد في صحرا
مهما كان 
هايعجبهم وهايحبوه .. لكن ماتستناش منهم انهم مايتنازلوش عنه قدّام أول بيتي بان يعدّي قدامهم
وعشان كده انت بطلت من زمان تروح للزباين لدرجة انك ساعات بترفض شغل كتير لمجرد انك تشوف نفسك في المرايا
وماتستغربش العضم اللي بارز في جسمك
على سبيل العما المؤقت وعلى سبيل إن الفرجة على جسمك في المرايا حرام زي ما بيقولوا وتستمتع بحبة الحرام اللي ماحدش شافك بتعملهم
وكأن جسمك ده مش من حقك .. مش بتاعك .. مش من حقك تكتشفه حتة حته وتشوف كل حتة موجوده ليه وعشان ايه
كأنك غريب جه الجسم ده بالصدفة في سكة سفر طويلة 
جه يريح وهايمشي قريب جدا لما يحين معاده
عارف
 انت مش مستعجل ع النهاية , ولو انك مش هازعل لو جت بدري.. لأنك بصراحة بتحب الحقيقة حتى لو هاتجرحك
ورغم انك احترفت الصراحة في  حياتك بس للأسف الصراحة مش دايما صح , مش معنى كده ان الكدب هاينجّيك
لكن مافيش مانع تعترف ان الصراحة الكتير جرأة وضد المثل اللي بيقول .. الجري نص الجدعنة
الهروب نفسه ممكن يكون حل 
الرسول نفسه انسحب من غزوة قبل كده عشان مايخسرش كل حاجه
في الاخر
بتلاقي نفسك بتجاوب على كل حاجه لوحدك وماتعجبكش الاجابات بس تبتسم لأنك عارف انك ماشي في طريق الحل
مش مهم توصلّه
المهم تفتكر أغاني عمرو دياب اللي دايما تمسك نفسك متلبّس وانت ناسي نص الأغنية وبتهته الباقي مع اللحن
على أعتبار ان ماحدش واخد باله من حركة شفايفك
لأن شفايفك مافهاش حاجه تخلي الناس تركّز معاها 
تقوم تقلب قعدة الغنا على أغنية انت حافظها كويس حافظها حرف حرف رغم انك أقنعت نفسك انك مش شرط تفهم كل كلامها
كثّف الكوكب في لقطة قصر وسط بيوت فقيرة 
قصر وسط بيوت فقيرة 
قصر وسط بيوت فقيرة
قصر وسط بيوت فقيرة   

3 comments:

Eman Muneir said...

هلوسة عقلية رائعة ، في منتهى العمق .. و الحزن

سميحة ميحة said...

انا هناك !!!:)(:

شاب فقرى said...

كلنا هذا الشخص الللى بيعشق امور عشان تنسيه حلمه الاعظم :(
كلنا نفس الر غيف يا صديقى ...

كلنا تعبنا بس مكملين

فقري