القاهره ...لحين إثبات العكس

- كل الأماكن أثبتت
ان ازدحام شوارع غربتي
مابقتش بتقيس الحاجات بالاشتياق -

أنا وهي والحب منزوع الوطن
ماعرفش عنها غير جبال مزروعه ستين سكة سفر
وما بيننا سينا
وبحر مات
ويهود
وقلوب ماهيش غاوية ابتهالات الغنا
في ضلوع منير
ونضال أميره عجوز
مؤمنه
إن القمر .. أقرب بصوت فيروز
وبرغم كل الطيّارات
والعبّارات البواخر السفن
وبرغم كل النازحين من ناحيتي
قسوتها زادت قسوتي
وماكانش من حقي إني أقايض ناس بناس
أو أقولها
طب سيبي دول وغرّبي كل البشر
كل الراحلين اليها
لحظة عبورهم بوابات قلبي زحمان البشر
ماسابوش لروحي ضحكتين
أو صوره أحضنها وأدمّع ع السرير
زي باقي الموصومين بالشعر
وبرغم كونهم .. كلهم
عاشقين مطارح قلبها السادي
وبرغم رغبة حبستي جوّه الوطن
قررت أغني للهوا
خدني
- خدني على بلادي -

منقوش على جبين الولد
وشم ابتهال العاصمه
عاصمة كل الحزانى المجروحين
أكتر مدينة
نني عين الشمس فيها
بيصحى ويشاور على وشوشهم
فتبان عليهم حرقته
أكتر مكان بتشم فيه ريحة البشر
من كل لون
وأي حد
تقدر تحدد قد ايه الحزن فيه
من مشيته
أكتر مدينة
مابيلعبوش فيها الولاد ع البحر
غير لما انتفاض البحر
يعلن غربته
ممنوع كمان على كل بنت سمارها بيهزّ الولاد
تنزل تعوم
مش بس لأن عينيها بتسقي العالم
كل معاصي السحر
لكن بارضه لأن بلدنا
مافيهاش بحر

تقر مدينة الاسكندر الأكبر
بإن الشاعر الاسمر
ماعادش بيوحش الكورنيش
على المذكور
وأية قاهري زعلان
يقول للنيل
وآل يعني خلاص النيل
بيستحمل دموع الناس
على المذكور
يبطّل يشتكي للبحر
عشان البحر مش ناقص
كفايه دموع عيون تانيه
بتملا البحر في الثانيه
بستّين جرح
على الأسمر كتير البوح
يروّح يشتكي للنيل
ماعادش البحر ناقص ملح


جرى إيه يا بحر مش ناوي يزوّرني المراكب
انا قلبي مش ناوي السفر على كل حال
لكن في حين لو يعني قررت البعاد
هارحل لمين
قلبي التعيس
غرقت مراكبه بين شطوط الأندلس
ضاقت حدود مدريد
كان صادفه سوء الحظ
رغم افتراضه العيد

مالهوش مكان
يا باريس
يا جليد بيزحف فوق وشوشهم فرض
أسمع كتير عن زحمة الأنوار
وإنك جمال الجنه من ع الأرض
يا باريس يا ملجأ للعيون اللي عطشانه أصوات الملايكه الجبارين
وأصوات المغنيين هناك
والمطر ..والجليد .. والطين
الشحّاتين في القاهره
منظر وِحِش
والشحّاتين في باريس
بيعزفوا الفيولين