علامة تعجب

- عارف أنا تقريبا كده باين عليا باحبك

- لا أكيد انتي غلطانه ..الشعور ده عمره ما

- بس بس بس بلاش فلسفه الحاجات دي مافهاش فلسفه انا عارفه انك بتحبني

- طب ممكن تبطلي رقص .. الناس بتبص علينا

- يا سلام .. انت اللي بتقول كده

- معلش لكل مقام مقال

- عارف .. عيبك انك بتحاول تفلسف وتظبط وتخطط لكل حاجه

- طيب ممكن اطلب منِك طلب ؟

- خير ؟

- ممكن تبطلي رقص على بال م العيال دي تعدّي

- ايه خايف منهم ؟

- لأ مش خايف . انا بس

- لأ انت خايف

- يعني هاخاف من ايه هاياكلوني ؟

- لأ هايضربوك .. صح صح عندك حق هم كتير

- هي مش بالكتره على فكره انا ممكن اضربهم

- هأ هأ هأ

- ها ها ها .. طب بطلتي رقص ليه لما عدّوا ؟

- خوفت عليك

- ليضربوني

- أممممممم أه بصراحه فيه واحد فيهم دراعه قد جسمك كان هايرقدك في بيتكوا ومش هاتعرف تيجي معايا الحفله ؟

- يا سلاام يعني بس عشان الحفله

- أيوه مانا بحبك ..فعايزاك تيجي معايا الحفله

- احنا ماينفعش نحب بعض

- ليه ؟

- عشان فرق السن

- طب بص ..قوم لف زي مانا بالف كده وانت مش هتاخد بالك من فرق السن

- باتكلم بجد

- انت عندك كام سنه ؟

- داخل في واحد وعشرين ... وانتي ؟

- 16

- خمس سنين .. كتير

- لأ مش كتير ..هي مريم كانت اكبر منك بكام

- الموقف مختلف انا ومريم كنا كبار

- كان عندك كام سنه لما كنت مصاحب مريم ؟

- 18

- وهي ؟

- أربعه وعشرين بس الوضع مختلف

- ماتضحكش على نفسك ..انت بتحبني بس خايف

- تاني .. من ايه مين هايضربني تاني المره دي

- أخويا

- اخوكي اللي شبه العمود الفقري ؟

- انت اللي بتتكلم عن الرفع ... انت لو كنت ارفع من كده كان زمانك اختفيت

- أهو شوفتي ..ده سبب تاني ..انا رفيع وانتي رفيعه ..لو اتجوزنا ... هانخلف عيل مش هانشوفه

- بس انا بحبك

-

- سكت ليه ؟

- مفيش ... صدقيني مش هاينفع

- لييييه ؟

- عشان انا .. عشان انا كبير وانتي صغيره

- انت مش كبير وانا مش صغيره ومريم كانت اكبر منك بست سنين وكان عندك تمنتاشر سنه شوفلك سبب تاني ... طب انا ناقصني حاجه ؟ ... قولي مابتحبنيش ليه

- مين قالك اني مابحبكيش

- تبقا بتحبني

- لأ.. فيه فرق

- يا بتحبني يا مابتحبنيش .. حدد موقفك

- بمفهومك انتي .. لأ مابحبكيش

- عشان انا صغيره ؟

- ده سبب

- وايه تاني ؟

- حاجات كتير

- أيوه زي ايه ..عاوزه أفهم

- بطلتي رقص ليه ؟

- باتكلم جد ..قولي ايه اللي مش عاجبك فيا

- مفيش حاجه فيكي ماتعجبش اي بني ادم

- اومال

- ممكن ماتعيطيش

- مش باعيط على فكره انا بس عيني وجعاني

- لأ بتعيطي

- ماتغيرش الموضوع ..

-

- رد

- !