Sunday, February 14, 2010

نوال السعداوي ... ونوعيتها ... وأنا

أخيرا وبعد عناء في البحث عن كتب لها قرأت ما يكفي من كتب الكاتبه العميقه العبقريه الفظيعه الرهيبه نوال السعداوي .. وحقيقة لم اجد في كتبها تلك العبقريه او العمق او الفظاعه او أي شئ من أي نوع سوى سخط وغضب ولعن سلفسيل أم اللي جابوا ده دين على سلسفيل ام الرجاله والمجتمع الذكوري والمجتمع السادي الذي يكره المرأه وعن المدرس الذي كان يقول للطلبة المسحيين في حصة الدين والغضب على وجهه " اطلعواا بره " صارخا غاضبا لاعنا أبو اللي جابهم البلد
وأنا .. وأحمد الله على قولة أنا .. أنا الذي أفنى في التعليم المصري عمره ولا يزال
وأخي وأمي وابويا وامكوا وابوكوا واللي جابوكوا دخلوا مدارس مصريه و أقسم برب العزه ولا أزكي على الله أحدا أني في حياتي لم أرى ذلك المدرس الذي يفعل ذلك ولم أسمع عنه ولم يسمع عنه أحدا غير السيده نوال .. ولكني وبما أن الطلاب المسيحيين كانوا لا يتجاوزون العشره من التمانين طالب فكان لابد ان يخرج العشره الى المعمل ليذهبون إلى قدرهم " أستاذ ميشيل " الذين يخرجون من عنده لاعنين حصة الدين . ونخرج نحن أيضا من حصة أستاذ مصطفي لنتقابل مع أصدقائنا المسيحيين في " الفسحه " لاعنين أم دي حصة قائلين غاضبين مش كنا خدناها " ألعاب " عشان نكمل الدوره
حديث السيده نوال السعداوي عن المرأة المصريه اللي طالع دينها يشعرني أنني كمصري يعيش على هذه الارض منذ عشرين سنه كامله أو يزيد لم أرى ما يتحدثون عنه من رجل يضرب امرأته في الشارع الا من حكاوي الاصدقاء الذين يحكون عن إن ابن عمتي شاف أو الواد حسن شاف النهرده حتة خناقه
وعندما تسأل حسن يقول لك للأمانه أنه لم يرى ذلك بل أن سامح قد حكى له
تمام كذلك الفيلم الجنسي الذي لم يراه أحدا لمطربه غير مصريه مع ممثل مصري والاثنان من زمن الفن الجميل وكلما سألت أحدا يقول لك بكل ثقه نعم .. ابن خالتي شافه
وبما أنني قد أكلت الدنيا على ضهري وشربت ثم عملت بيبي وقد رأيت من مهازل - لا اخفيها - ما لم يرى الكثيرون
فأرجوا من كل من يقرأ هذا المقال ان وجد رجلا يسب زوجته في الشارع فليذهب له ويصرخ في وجهه ويلعن دين أمه ويقوله عيب يا ابن الوسخه ياللي جبتلنا الكلام . جتك الارف
واذا راي هذا المدرس ابن الوسخه ايضا الذي يطرد زملائه المسيحيين أن يقوم في وسط الحصه مشيرا له بأصبعه الأوسط قائلا .. اتكلم مع الناس عدل يا أستاذ انت
------------------------------------
الكاتب مصطفى فتحي كاتب شاب وهو عضو في راديو ناجح يسمى راديو حريتنا . علما بأني الشهاده لله لا اعرف الرجل معرفه شخصيه ولم أقابله الا لمدة عشر ثواني عن طريق صديق مشترك قال معرفا ايانا لبعض .. زيكا .. ده مصطفى فتحي .. مصطفى فتحي ده زيكا وتبادلنا الابتسامات .. اذن فانا لا أملك عليه الا ما يقدمه لي من " نوت" على الفيس بوك أو كتاب أقرأه
أنا وقد اعتدت ان اشتم كل الكتاب الذين لا أفهم منهم شيئا ولكن في قرارة نفسي وفي مكان لا يراه أحد حتى لا أجرح شعور أحدا
ألا وهو الحمام .. ولكن مشكلتي مع الحمام أني عندما اسب أو العن دائما ما الحق شتيمتي باستغفارا لله تعالى
فمتعة شتيمة الحمام .. انه لا يحق لي أن أذكر الله في هذا المكان النجس . كما يقولون . فأشتم براحتي
ولكني لم أشتم مصطفى ولن اشتمه ولن أتفوه كلمة تجرحه ف الرجل أولا وأخيرا يقول رأيه .. ولكني سأدعي له لا بالهدايه فأنا اخر من يتكلم عن ذلك ولكن أدعي له بأن يلهمه الله المنطق الذي لا يجعله يكتب كلاما عجيبا
ثم عندما يرد الناس عليه بالمنطق لا يرد عليهم ويتجاهلهم مكتفيا بتعليقا
بهذا الشكل
:))
حسنا .. أنا أستطيع أن أفعل ذلك .. من الصباح الباكر سالعن الاسلام والمسلمين والرجال وأقول كل ما يتنافى مع مبادئي من أن الاسلام والمسلمين وحشين وولاد كلب وأن المصريين ولاد كلب وان الاخوان ولاد كلب . وأننا نعيش في ظل حياة بنت كلب .. وأن الذين يقيمون الصلاة أثناء عملهم - لعنهم الله - ولاد كلب
وأن أي شئ متعلق بأي شئ على العموم وارتضى به الناس ولو قليل هو تخلف وجهل وحاجه بنت كلب
وقتها سيرد على الاصدقاء بالمنطق
ووقتها سيدخل صديق معين لي يلهمنى بفتوى رهيبه صادره من هيئة الفتوى المصريه الازهريه - تخيل بقا - قائلا أنه يجب علي ( فلترة ) قائمة الاصدقاء لدي لانها تمتلئ بالمتخلفين والرجعيين والذين يردون بالمنطق ويعترضون على رأيي الحر المثقف الواعي
الصديق مصطفى فتحي - واسمح لي باعتبارك كاتبي الأسوأ ان أعتبرك صديقي ووهذا شرف لي والله - أرجوك اما ان تعمل بالمنطق أو لا تتكلم عنه .. أرجوك .. أبوس ايدك يا جدع
فآرائك التي يعتبرها اتنين تلاته في الميه من الذي يردون على مقالاتك عبقريه هي بالنسبة لي ولباقي الميه في الميه هي دربا من شخبطة الوزير فاروق حسني الذي يعتبرها اتنين تلاته في الميه عبقريه بينما يتفق معي باقي الشعب والعالم بأنها مجرد شخبطه سخيفه جدا للغايه ... أوي
نوال السعداوي .. مصطفى فتحي .. فاروق حسني .. وغيرهم
والله لم أفقد بعد احترامي لكم لأنكم تكتبون بحريه وأنا أعشق الحريه وقد أموت دفاعا عن أن تقولوا لنا آرائكم الملهمه العبقريه ...أي والله
ولكن أرجوكم .. كفايه
كفانا الله واياكم شر الهراء
ملحوظه : لا أضع مصطفى فتحى بين نوال السعداوي وفاروق حسني ولكني فقط أقول أن الهراء غير مرتبط بسن او بمركز انما مرتبط بفكر
فمصطفى فتحى وأمثاله من شباب جيلي .. الباحثين عن الحريه هم أول من يدوس بكلتا قدميه على حرية الاخرين في الرد عليهم
علما بان مقالي هذا لا يعد - تربية عداوه - وانما هو نتاج خروجي من الحمام مستريحا وقلما يحدث ذلك

14 comments:

None said...

فمتعة شتيمة الحمام .. انه لا يحق لي أن أذكر الله في هذا المكان النجس . كما يقولون . فأشتم براحتي

الصراحه جامده اوى موتتنى من الضحك
:))))))))))))

سارة نجاتى said...

مش عارفه قولتلك ده قبل كده و لا لأ بس كان فى مرة فى كتاب لعلى سالم بيقسم المثقف لنوعين المثقف الحقيقى و المثقف النص لبه فاروق حسنى طبعا من النص لبه

أن لم أقرأ لنوال أو لفتحى لأحكم

المثقف الحقيقى واحد كده زى عمك نجيب محفوظ , أحمد فؤاد نجم ,أحمد عبد الله رزه

بص ما علينا
بخصوص نوال السعدواى
أنا مبحبش الكتابة المنتحبة دى
بس أنا المدرس بتاعى و أنا فى ابتدائى ( أديك بتسمع تجربة سخصية أهو ) كان لما بيغيب المسيحين فى العيد بتاعهم كان بيخلى الحصة دى حصة شتيمة عليهم
و يبدأها ( المسيحين دول يا حبايبى ولاد كلب ) و كنا وقتها فى ابتدائى
و انا لو كنت كبيرة شوية كنت بلغت عنه و الله
و لما جات مسابقة أوائل الطلبة و كان المفروض يختار أشطر طلبة عندوا يشتركوا فيها اختار مسلمين بس و ما اخترش مسيحيين مع العلم أن الأول علينا كان مسيحى فقام بدلوا بواحدة كانت واخده ملحق بس السهادة لله كانت فيها ميزة تانية , كانت مسلمه هههههههه

شفت الوطينة بقى ؟؟

بخصوص الضرب فى الشارع , فسيبك من الوسط اللى انت بتحتك بيه عشان مش كل الناس كده , واحد اعرفه كويس مش بس ضرب مراته فى مدخل العمارة عندهم , لكن طردها بقميص النوم اللى عليها عشان كان قاعدة بتعمل محشى و ماطلعتش سلمت على ابن خالته لما جت
هى قعدت تحلف ان ايديها كانت مليانه محشى
و هو مش مقتنع ان ده سبب كفاية ههههههههههههههههه

ح أقوله أنه حد تيييييييييييت بالنيابة عنك ههههههه

فالمشكلة فى طريقة التناول , هدف التناول , مش وجود الشىء من عدمه ( ده رأى فى ما يخص السعداوى من واقع اللى انت قلته لأن مرقتلهاش حاجة )


منور يا فندم

Magi Mostafa said...

ياريت يا زيكا والله يعنى ده من احلام اليقظه بتاعتى انى الاقى مجتمعنا لطيف ظريف مش عنصرى ومفيهوش رجاله بتضرب مراتتها فى الشارع بس للاسف النموذج ده موجود ومنتشر
*انا كمان مشفتش المدرس الى بيطرد المسيحين من الفصل وشفت اتنين اصحاب مريم وايمان بيغشووا بعض فى امتحان الدين لانهم بيذاكروا الدين سوى
بيغشوا صحيح ودى مش حاجه كويسه ولا مقبوله فى اى دين بس وحده وطنيه برده
بس ده مش معناه ان الحياه زى الفل ومفيش عنصريه لان العنصريه موجوده ومتربعه جوه ناس كتير مسلمين ومسيحيين
صديقه جارتى المسيحيه الى رحبت بيا وانا عندها بساعدها لانها عيانه وبصتلى باستياء لما لبست الحجاب وانا راجعه شقتى ..زميلتى فى الكليه الى قعدت تشكر فى دكتور عندنا ولما عرفت انه مسيحى لعنت اليوم الى عينوه فيه معيد
*تنط نوال مش بحبها لانى بطبعى مش بحب الناس الى بوشين ولا الى متفهمش نص كلامهم عشان عايزين يمشوا على الحبل او يقفواعلى نص السلم زى مصطفى فتحى وان كان اسلوبه -فى كتاباته- حلو
بس هو مغرم بالممنوع -مش بحب الى بيكتبوا عشان يقولوا بعد كده احنا كسرنا الحواجز وعبرنا الخطوط الحمراء الخ-
*فوبيا الدين عند ناس كتير منكرش انى احيانا وفى لحظات قليقله بلتمسلهم العذر لان ناس كتير بتاخد الدين سلاح تقرف بيه الاخرين زى تنط الى حبستنا فى حمام المطعم الى كنت بحتفل فيه بعيد ميلادى ومسكتنا تفصيص ونصائح لاننا لابسين بنطلون وحاطين مكياج لا وايه لابسين الوان فاتحه

adel said...

أرفعلك القبعة يازيكا وانا خارج من الحمام برضه

10/10 ياواد
بس بالنسبة للتالت اسماء اعتقد
انهم فعلا ميختلفوش مع بعض فكريا

بس كل واحد و شخبطته و محتواها

Zika said...

فنان

الله يكرمك يا ريس يارب كده عاجبينك دايما
منور

Zika said...

ساره
بخصوص المدرس طبعا بيكن ضغينه وده انا ماجبتش سيرته ولم انفيه يا ساره
ازاي تعملي المصيبه دي
وتخلطي بين مثال حصلك وبين مثال انا ماقولتهوش ؟؟

بالنسبه للي ضرب مراته
موجوده حالات فرديه في كل العالم ومصر تحديدا في حاجات عنف
لكنها حالات فرديه بمعنى اننا وده العموم بننقد الراجل ده
مابنقولش عليه تمام والمجتمع كله اي حد هاتحكيله اللي حصل هايشمئز تبقا حالات فرديه
لكن نوال السعداوي بتتكلم عن العنف ضد الستات كانه مبدا حياتنا
على اساس يعني انا كل يوم الصبح باضرب صاحبتي قلمين على غيار الريق
وابويا بيضرب امي علقه كل سبت وتلات

انا كلامي واضح يا جدعان الله يخليكوا والنبي

ساره بالله عليكي انا بحبك بلاش تخليني .. احبك بارضه يعني هاعمل ايه هههههههه
قدري ومكتوب
منوره اكتر من البلوره بشويه

Zika said...

ماج
العنصريه موجوده بالطبع من الطرفين ومن اطراف تانيه مش ممكن نتخيلها واظن انا وانتي اتكلمنا في الموضوع ده قبل كده .. فاكره ؟
انا أول واحد مؤمن ان فيه عنصريه في مصر
لكن حالاتها الفرديه بتطغى على عموميتها وده مبدأي
متفق معاكي في الباقي
منوره

Zika said...

دووولا
انا اللي ارفعلك كل حاجه يا دولا والله
باحبك عشان دماغك عاليه يا والاا
:D

Che said...

انا قريت زمان لنوال السعدواى و اكتشفت انه الطريق الاسهل للشهره انك يا تشتم حد مشهور يا تشتم الحكومه يا تشتم الدين و الناس اللى مقتنعه بيه و مش هقول اكتر من كده عليها عشان صوابعى بتوجعنى من السيره دى
انا برضه مقرتش لفتحى الا انى اثق فى حكمك يا زيكا .. يعنى مثلا هو خد المزه بتاعتك عشان كده انت محروق منه
و بالنسبه لفاروق حسنى انا مشفتش لوحه بس بسمع اخباره
حصه الدين دى انا مش هقدر اتكلم عليها ... يا عم زيكا انا مكنتش بقعد فى المدرسه من اساسه يبقى هعرف حصه الدين شكلها ايه و بيعملو فيها ايه
ضحكت جدا على تعليق ساره لما قالت المدرس كان بيقولهم ايه على المسيحين لما بيغيبو ... و النبى ابقى قولها يا زيكا
المشكله يا زيكا انه معندناش وسط ... تلاقى اللى بيشتم بالدين و اللى ناقص يخلى الناس تعمله تمثال من كتر ما مبين و خلى بالك من مبين دى انه راجل
متدين و بتاع ربنا
واحد بيضرب مراته فى الشارع و التانى مراته هيا اللى بتشبشبله فى الشارع و فى البيت و فى كل مكان حتى فى احلامه
و اخيرا و بما انك لسه خارج من الحمام
شفيتم يا زيكا

Bent Men ElZman Da !! said...

يمكن الوحيده اللى قارتلها نوال السعدوى
الست دى دايما مخليانى مزبهله
من كتر ما انا حاسه ان بيجيلى تخلف من اللى بتكتبه
ماشفتش بصراحه واحد ضرب مراته فى الشارع قبل كده
وماشفتش مدرس شتم فى مسيحين قبل كده العكس صحيح
بيتهيالى هى شخصيه معقده نفسياً اصلا :D

z!zOoOo said...

السلام عليكم

ازيك يا زيكا

وصباح الخير بتوقيتي دلوقتي

بص يا زيكا

نوال السعداوي ديه من النماذج الرمه بجد

في المجتمع

المصيبه إني اتخبطت في مقالات ليها وانا صغير

وإتصدمت ساعتها

بس مالنسيتش الي كانت كاتباه

إتخيل لما تلاقي طفل بيقراه عن الفاظ عن الاعضاء التناسليه للمرأه بمحتوياتها بكل بجاحه وإباحيه

إيه رد فعلك

ده غير باقي المقال كان زباله

وأرائها دايما زباله

فيه حاجه قالها تشي

بس احب اضيفله عليها حاجه

الي عايز ياخد شهره

فعلا يا يشتم حد مشهور

وبقوا ينفضوا المشاهير اليومين دول

يا يشتم الحكومه وبقي الي عايز يمشي في نفس المسار عايز فتره كبيره قوي وخبره كذا سنه

عشان يا خد شهره السب في البلد او في الحكومه

إنما الاسهل إيه

المهاجمه بإسم الدين والتحرر

الي صدقني الغرب دلوقتي بيبعد عنه

وإحنا الي ماسكين فيه

زي التور الي مغميين عينيه

أتخيل ان الاخت نوال السعدواي

بيتقول درست كل الاديان

ومستعده تدخل في مناظره مع الشعرواي

وماقالتش الكلمه ديه

إلا بعد وفاته

والمعني في بطن الشاعر

طيب فيه واحده دارسه لكل الاديان

وإسلوبها كده في الكلام

بص الي إكتشفته من الاخر إن الاخت نوال قصدي تيته نوال

بتناصر اي شيء مختلف

وبتعشق الاختلاف ليس لإثباته

لا لكن للتميز بالاختلاف حتي ولو كان علي باطل

قريت إنها قبل كده بهائيه هي وبنتها ومناصره للبهائيه

ومع كتابه اسم بهائي في البطاقه

ومع حريه الشواذ

وإن الطفل يكتب بإسم أمه عادي

يابني والله الست ديه خساره

إنك تقراها

ديه اخرها إنك تحط كتبها ومقالاتها في الحمام

كلينكس

وانا ماشفتش حوار المدرس إياه ده

دول بيبقوا نوادر او قله

والستات الي بتضرب اه موجودين

بس مش كل الرجاله كده

طب مافيه ابهاتنا وأمهاتنا

ليه مش كده

وأخواتنا الولاد والبنات الي متجوزين

وبعدين لو علي كلامها هتتحول العلاقه مابين أي ذكر وانثي لصراع ووحشيه اي كانت صورتها او صله قرابتها

يعني الاب والام والاخ والاخت والزوج والزوجه..و .و .و إلي اخره لخناقات لا
تنتهي

اما الاخ فاروق حسني فكفايه فضايحه
وغير ده كله انا مش عارف فنان ف إيه

الظاهر ياض يا زيكا كل ما واحد يطلع يكتب كلمتين في الهجايص

ولا يرسمله لوحه تجريديه بوهيميه

يلاقي تصفيق حار وإنه رائع ولم يحدث من
قبل

وإنه فنان بالفعل


ربنا يريحنا منه و منها ومن امثالها

والحمد لله

ماقرتش للأخ مصطفي فتحي

عشان مايبقاش ليه نصب في السخط

ويارب يعدل من كتاباته

عشان ماياخدش الكره من اول مشواره وينحصروا قرأه

معلش طولت عليك يا زيكا

بس انا اصلا كتير بتكلم عن الست ديه

مبقوق منها قوي

بدال ما تشوف اخرتها شغاله رغي

علي فكره انا علقت عند بطوط

تحياتي

Zika said...

bent men el zaman dah
:D:D
اهو اي حد بيقول اي كلام وخلاص والمفروض ان احنا نعد نسمع العالم دي
مش عارف ليه

Zika said...

zizo
منور :D

Anonymous said...

بص يا يازيكا معلش هتلاقي كل الكومنتات كده علي الرغم من مش بحب شتيمتك الخارجه ووعلي الرغم اني مختلف م\ع مصطفي فتحي لانه لاغني من الفيس بوك بتاعه لاني اختلفت معه في رايه و الصراحه شتيمته شتيمه المثقفين ل معرفش ازي بس لاقيته زودها قوي وكمان فعلا احينا مبيردش وكمان قرايت لنوال السعدواي الفعلا من كوكب اخر اما انكل فاروق ............. بس بجد انت تحفه جدااااااااا اسلوبك شيق بشكل مش عادي الله ينور ويهديك ياعزيزي وتكون كاتب مشهور