Tuesday, September 15, 2009

رخامه

بما ان الشيطان واخد اجازه .. ابن المحظوظه .. وانا لأ فقررت اني ارخم على خلق الله عملا بمبدا ان غاب شوشو العب يا زيكا
ولكن وللاسف اتقلب السحر على الساحر ازاي
حد يقولي ازاي؟
ااقولكوا انا ازاي
من كام يوم ركبت تاكسي من التحرير للمعادي الساعه اتنين بالليل
واحد ذكي يسالني ويقولي ايه اللي يوديك اخر الدنيا في ساعه زي دي
وطبعا مش هارد ...
واحد تاني يسالني ويقولي مش هاترد ليه ؟
رخامه
المهم ... ركبت التاكسي وقولتله ع العنوان ونزلني تحت البيت بالظبط .. بعدين افتكرت اني ماعيش سجاير قلتله رجعني بس عند الكشك اجيب سجاير
رجع
رجعني عند البيت تاني بقا معلش
رجع
اخ .. نسيت اجيب مناديل
- مش هاينفع يا استاذ بقا
- يا عم ارجع وهاحاسبك
رجع
وبعد ما رجع
طلعت من جيبي سجاير ومناديل وانا بحاسبه وماحاسبتوش ع الزياده
===========
اظاهر كده بيقولوا ان فيه حمله عشان الزباله تتلم من محافظه الجيزه عبال ما يتفاهمه مع شركة الزباله
وبما ان رمضان جه
وانا قررت
ابقى
" رخم بزياده "
لقيت شباب زي الورد لابسين كويس وحاطين حاجات على بؤهم ولابسين جوانتيهات وبيلموا الزباله وشباب وبنات زي الورد
قررت اني اشوف شغلي بقا
لا يا ناصحين مش هالم الزباله
قررت اني ارخم
جيت جمب ولد وبنت من اللي بيشيلوا الزباله
وقلتلهم
بالذمه دي بلد دي لما شباب زي الفل كده يلموا زباله
- هانعمل ايه بقا يا كابتن بارضه دي بلدنا ولازم نحافظ عليها
- يا راجل تحافظ عليها مين هو يعني لما تشيلوا الزباله الناس مش هاترميها تاني .." العيب في النظام يا كاويركات"
- يا عم عندك حق ده حتى الناس فاكرانا من شركة الزباله وعمالين يشتموا فينا
- اه يا عم وبعدين بصراحه بقا يا مان انت زي اخويا .. مناظركوا عره خالص وانتوا بتشيلوا الزباله
- الواد رد ( محبطا ) هانعمل ايه بقا يا عم ماهي مش هاتنضف غير كده
وسيبتوا ومشيت
ساعه الا ربع ورجعت لقيته بارضه بيلم الزباله
البلد لسه بخير والله
===========
طبعا انتوا عارفين ان الجواز قسمه ونصيب
وانا روحت اتقدمت لواحده
من سني
ومن توبي
وابوها صاحبي واسمها ليه معايا ذكريات حلوه
قرينا قاتحه الحمد لله
اينعم هو ماكانش حافظ الفاتحه اوي بس مش مشكله
اتفقنا على كل حاجه ولو ان البنت اصغر مني ف بالتالي هاضطر استني شويه
بتاع عشرين سنه كده
لكن الحمد لله خلاص اتفقنا على كل حاجه
المهر
بامبرز اكيد
لأ مش ليا يا غبي ليها هي
وطبعا هي مش هاتاخد مساحه عشان عندها سنه وشهرين
وان شاء الله انا اللي هابقي اغيرلها
وهاصرف عليها لحد اما تبقى عشرين
حيث بقا انا ابقي شاب كونت نفسي وعندي بتاع اربعين سنه
فاتقوم هي سايباني وتتجوز واد مقطقط كده من سنها

========
واحد ظريف وباله مش طويل يقولي انت كاتب البوست ده ليه
رخااااااااامه
اعملكوا ايه
مش لاقي حاجه اعملها وبعدين الرخامه دي من اسمى معاني الحياه
بالذمه حد يقدر يعيش من غير ما يرخم على بني ادم
شوف يا اخي ظلم الانسان لاخوه الانسان
ماحدش يستحمل صاحبه كده ابدا

9 comments:

MǿиY El-Shreef said...

hehehe

ana 3an nafsy e........ mn el post dah ya zika :D

mafhmtsh ay 7aga f ay 7aga

leh keda yabni :D

tyb han2ol eh ,a2boly ya3amo

:P

MǿиY El-Shreef said...

awelllllll ta3leeeeq :D

,a2bola = ma2bola

micheal said...

سيبك أنت..موضوع الشباب والزبالة هو أكثر ما لفت إنتباهي..تفتكر ممكن يجي اليوم قبل ما نموت اللي نشوف فيه مصر نظيفة؟؟
والله نفسي فيها أكتر من كأس العالم

break said...

عجبنى اوى موضوع الشباب والزبالة
بجد احترمتهم
ويمكن عشان الشيطان مش موجود كمان متأثروش

بجد ربنا يحميهم و ربنا يجزيهم خير

اما بالنسبة للرخامة
فهو شعار جميل جدا
ومبرر حلو لكل حاجة
ومقنع



كل سنة وانت طيب :)

الدرعمي said...

ههههههههههه عليا النعمة انت عيل سكرة و دمك زي العسل .. جهز نفسك عشان أشوفك بكرة فور الإفطار .. ممكن يا باشا ؟؟ و كل سنة و انت طيب

سارة نجاتى said...

طول عمرك رخم يا زكزوكتى , ما كنت عملت لك واحد اعلان مع مكى " رخم بزيادة " و كنت طلعتلك بقرشين كويسين

mahasen saber said...

انا لو كنت سواق التاكسى ده كنت ربطتك فى التاكسى من ورا وجبتك من التحرير للمعادى مشى فى نص الليل

رخامه بئا هههههههههه

عيد سعيد يا زيكا يا جميل
ويا رب دايما كل ايامك مباركه

Che said...

لا رخم رخم بصحيح يا زيكا
كل سنه و انت طيب

micheal said...

أنت ياض يا رخم أنت..عاوز أشوفلك بوست جديد