Monday, November 24, 2008

ودلوقت ... نهي رشدي بقت اسرائيليه

ياجدعان كفايه بقي يا جدعان ... نهي رشدي واحده اتعرضت للتحرش الجنسي في مصر يعني لو حتي من جمهورية شومبونجو لازم تاخد حقها
ثم ان علي حسب كلام نهي رشدي
هي من عرب 48 واتولدت في ليبيا ومخرجتش بره مصر في حياتها غير مره واحده سافرت لفرنسا لمدة شهر ونص في منحه من مصر
يعني عربيه .. مصريه
زهقت من تغيير الموضوع
زهقت من دفن راسنا في التراب وعدم الاعتراف بالمشكله
دلوقت عشان نغير الموضوع نقول ان نهي رشدي اسرائيليه
وده ليه بقي ؟
عشان نتعاطف مع اللي اتحرش بيها
ونقول لا
تؤ تؤ تؤ
يا عيني
يا حرام
شوفتوا المسكين ده كان في مهمه وطنيه ( بما انها اسرائيليه بقي ) !!؟؟
وبعدين مين اللي قال انها لو زفت اسرائيليه يبقي ديننا واخلاقنا ومجتمعنا يسمحلنا اننا نتحرش بيهعا وناذيها في الشارع
وعايز اقول لكل شاب مصري متعاطف مع المتهم
لو نهي رشدي دي كانت اختك
كان هيكفيك في الواد ده عشر سنين تعذيب
والله يا جدعان انا لو كان عندي اخت بنت وحد اتحرش بيها
اقسم بالله ما كنت هخليه ينفع تاني خالص
وبعدين الناس اللي بتقول ان المحاميه بتاعتها هي اللي طلعت عليها الكلام ده
وده طبعا مش محتاج فقاقه لانك تعرف انه تغيير في مسار الموضوع
( دي مش قضية تحرش .. احنا ماعندناش تحرش دي بت اسرائيليه معفنه عايزه تعمل فتنه ... اخص عليها اخص)
نهي رشدي في حوارها مع اليوم السابع قالت انها - المحاميه- هي اللي اتطوعت ومش هي محاميتها الاساسيه دي متطوعه من احدي لجان حقوق المراه في مصر
ومافيش ادله علي اللي هي بتقوله
اتقوا الله
الرسول عليه الصلاة والسلام بيقول
" لو ان فاطمة بنت محمد سرقت .. لقطع محمد يدها "
يعني الرسول نفسه مش هيتعاطف مع بنته لو عملت حاجه غلط
تبرير الغلط هو سبب المشكله
نهي رشدي هي اختي واختك
وامي وامك
وصاحبتي وصاحبتك
وزميلتي وزميلتك
وخالتي وخالتك وعمتي وعمتك وقريبتي وقريبتك
وجارتي وجارتك
وانت ماترضاش لحد من دول ان حد ياذيهم

18 comments:

احساس لسه حى said...

عزيزى
انا هعلق على موضوعك
وزى ما طلبت اعلق هنا وارد عليك عندى

اول حاجه معاك متفرقش نهى مصريه امريكيه اسرائلية

الموضوع مش شئ سياسى وراى دى جريمة وقضية وميفرقش فيها جنسية المتهم

واللى بيدفعوا عن المتهم مش بيدفعوا عنه لانه مغلطش

بس فى ناس شايفين الحكم كتير

وبيقولوا لانه سواق غلبان اخد الحكم ده لاكن لو ابن باشا كانت القضية باظت

وفى ناس تانى بيقولوا ان نهى تاجرت بالقضية وعملت مهرجان وده للشهرة

وفى ناس وانا بقه منهم

شايف ان المدونيين اللى اتكلموا عن نهى باسم حقوق المراه والانسان

سايبين حقوق نساء كتير بتضيع وبنسمع عنها وساكتين ولا بيقولوا عنها كلمة

طيب انت اتكلمت عن نهى عندك فى المدونة

هدور فى مدونتك كلمة عن ميرفت او اى حادثه زى ميرفت

وهرجع ارد على تعليقك عندى

تحياتى

سلام

Empress appy said...

هو انت لسه فاكر
دى المحاميه يا بنى اكرت كل الكلام تانى يوم اللى مسجلها على قناه تانيه الادهى انها طلعت على العربيه وقالت انها بتدعو الشباب العرب التحرش بالاسرائليات
علشان دى نوع من انواع المقاومه هههههههههه
عموما هبقى انزل الفيديو دى محاميه سايكو

سارة نجاتى said...

زيكا
أنا زهقت من نهى رشدى و من المدونين العيانين , و من الولاد المتحرشين و من الولاد اللى مش متحرشين بس نفسهم يتحرشوا , و من الولاد اللى مش عاوزين يتحرشوا , كله مخه راكب على كلام عمال يعيده " نهى " اسرائيلية , نهى كانت لابسه مش عارف ايه , البنات هما السبب فى التحرش , الرجاله كمان بيتحرش بيهم , ايه ده ؟ غباء جماعى ؟ و نرد و نقول على كل واحد رد ممكن بالمنطق و رد مقنع جدا , و بمنطق ما يختلفش عليه عاقل و مفيش فايدة.
احنا بنكلم نفسنا يا ابنى , واحدة سواق تحرش بيها , رفعت قضية , كان فى شهود , خد حكم , فى ايه ؟؟؟؟
هى بقى عملت شهرة عملت عجة ؟ ملناش فيه ؟ طب ما لازم تشتهر , و على فكرة نهى رشدى دى ح يفضل يتكرر اسمها لمدة مية سنة , مش عشان هى عالمة طاقة نووية , لأ , عشان فى كل بحث علمى عن وضع المرأة المصرية , ح تسجل الواقعة بتاعتها كأول واحدة ترفع قضية تحرش فى تاريخ مصر المليان تحرشات و تكسبها
و بعدين "احساس" برده معلق على ميرفت , عارف عاوز تساعدها تعمل ايه ؟؟ تتبع القضية ابعت نشرات لمنظمات حقوق
الانسان , ابعت للجرايد
حاول تلفت أنظار المدونين فى مدوناتهم للموضوع بدل ما تقعد تهاجمهم , عرفهم الأول و بعدين هاجمهم لو ما اتحركوش
ح تقولى أنتى بتعملى كده ؟
أه , فى موضوع دلوقتى بس مالهوش دعوى
بالتحرش ماشية فيه


و بعدين موضوع ميرفت حاجة و نهى حاجة تانية خالص , ميرفت جزء من سيناريو اعتداءات الشرطة و الأجهزة الأمنية على المواطنين سواء اعتداءات جنسية او غير جنسية , اللى حصل لميرفت ضرب متعمد من ضابط أدت لوفاتها , المفروض يا احساس السؤال يبقى , "اشمعنى عماد الكبير مش ميرفت؟ ", مش ليه نهى مش ميرفت , لأنه مش راكبة على بعض , نهى سبب الاحتفاء بيها أنها ماقلتش سمعتى , و خافت زى الباقيين ,بس على كده

و بص بقه يا زيكا أنا ضغطى على , و


أكتر من كده ح أعمل جريمة فى مدونتك ,
ههههههه

سلام يا باشا

البت المشمشية حلوة بس شقية said...

موضوع مستفز وبيدايقنى اساسا 0000000 على فكرة اسم المدونة جامد وانتا دماغك اجمد

البت المشمشية حلوة بس شقية said...

موضوع مستفز وبيدايقنى اساسا 0000000 على فكرة اسم المدونة جامد وانتا دماغك اجمد

احساس لسه حى said...

عزيزى
زيكا

معلش هرد على سارة

وهبتدى بسؤال سألتيه

ليه عماد الكبير ومش ميرفت ده سؤال

لان عماد الكبيير متصور فيديوا والفيديوا انتشر وبقيت فضيحة

وانا يا ستى مش بهاجم ميرفت انا بهاجم المدونيين اللى بيدفعوا عنها باسم حقوق المراه

وبقول يا مدونيين الدفاع عن الحقوق لاتتجزأ واللى يهتم بنهى يهتم بميرفت

انا عن نفسى ولا قولت كلنا نهى ولا جبت سيرتها ...عارفه ليه


لالن كل القنوات استضافت نهى ومجبتش السواق

ولو تفتكر من سنه البنت الطفلة اللى طلعت حامل استضفوها فى القنوات واتكلموا عن الوحش اللى خلاها حامل

وطلع فى الاخر الوحش برئ

بجد تناول الموضوعات دى مفهاش اى حياديه

كفايه بقه خناق وخلاف يا سارة

ونقسم الفكر بينا لان اساس مفيش خلاف بينا

انا مع نهى فى انها تاخد حقها

وضد المدونيين اللى عمالين يعيدوا ويزيدوا فى نهى والتحرش

سمعة الرجالة بقيت فى الحضيض كده

وسمعة رجالة مصر من سمعة مصر

تحياتى سارة

تحياتى يا زيكا

سلام

م/ الحسيني لزومي said...

اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا

dina said...

اه و الله حاجة مستفزة جدا ان شالله تكون صهيونية حتى...مش دا حق للبنى ادمين عامة
يعنى احنا اللى بيفرق اخلاقنا و اديانا عن غيرنا...اننا فاهمين يعن ايه بنى ادم

شقاوة شعب said...

رغم انى مش متابعة تفاصيل الموضوع قوى الا انى لا اقبل ابدا كلام المحامية بانها تقبل التحرش بالبنت اصلها اسرائيلية

هو عمر النبى صلى الله عليه وسلم لع غزة او اى من غزوات الصحابة والتابعين بعده الا وكانوا بيأكدوا على الجنود مايقتلوش شيخ كبير ولا طفل ولا مرأة

هل الاسلام يبرر الاساءة لأى امرأة فى الدنيا لمجرد انها غير مسلمة

ده اسمه تهريج

تحياتى
شيماء

mado80 said...

كل سنه وانت طيب يا زيكا
يارب تكون بخير يا مان

Zika said...

احساس لسه حي
اولا اسف علي التاخير في الرد
ثانيا انا قعدت اكتب في تعليق وبعدت ما خلصت النت فصل والتعليق ضاع
عموما ..
كنت بقولك
الناس اللي بتتكلم عن ان العقوبه اكتر من حجمها دول ليهم راي قانوني يروحوا يعترضوا بيه للقاضي وده في الحقيقه ما يخصنيش في حاجه
والناس اللي اقلت نهي ردشي تاجرت بالقضيه للشهره .نهي رشدي اساسا مخرجه ( ولو كانت عايزه شهره كنت هتلاقي افلامها دلوقت كلها مغرقه الدنيا بعد القضيه وده ماحصلش )
والناس بقي اللي انت منهم وده المهم
المدونين دول هم اللي فجروا كل القضايا اللي ماكانتش بتوصل للراي العام وقضية ميرفت زي ما قولت عندك في مدونتك ليها بعد سياسي اكتر من بعد اجتماعي
عشان كده هتلاقي مواضيع عن قضيتها ( مش عن شخصها ) ( البنت اللي اتصورت وظابط الشرطه بيعذبها )
في المدونات السياسيه
وقضية نهي رشدي اجتماعيه ده عيب في الشعب المصري واحنا بنحاول نصلحه والموضوع منتشر اكتر من غيره لان معظم المدونات اجتماعيه اكتر منها سياسيه وبالتالي غلب الموضوع علي اي موضوع تاني
وهكذا
مش هتلاقي عندي اي حاجه تخص ميرفت انا كان ماسح مدونتين سابقتين ليا واظن اني اتكلمت في وقت عن قضية تصوير الناس وهي بتتضرب علي ايد ظباط
والقضيه كان واخده بعد سياسي يعني ما اتكلمناش عن ميرفت بشخصها
اما نهي رشدي اتكلمنا عنها بشخصها لانها وقفت قصاد الناس كلها وخدت حقها
واحنا شجعناها علي كده
ودايما هتلاقي اي موضوع عن نهي رشدي ما بيتكلمش عن نهي رشدي بس لأ عن القضيه كلها
( خصوصا عندي )
نورت
تحياتي

Zika said...

appy
واضح انها محاميه متخلفه فعلا يا آبي

Zika said...

ساره نجاتي
هدي اعصابك يا ساره
كوباية ليمون ساقعه متلجه لخالتك ساره يا بت
:d
كلامك منطقي جدا يا ساره وردك علي احساس منطقي جدا
نورتي كالعاده
تحياتي

Zika said...

البت المشمشيه
فعلا الموضوع مستفز
شكرا . ربنا يكرمك
نورتي
وتنوري دايما

Zika said...

احساس لسه حي
انا ممكن اتفق معاك في نقطه
ان الصحافه في مصر والاعلام مش حيادي
او خلينا نقول انهم بيحبوا الزيطه
بس ده ماينفعش يتطابق مع موضوع نهي
:d
لانه بيخص سمعة مصر
تحياتي
وتنور دايما

Zika said...

م/ حسين لزومي
لا مش هشارك

Zika said...

dina
فعلا حاجه مستفزه
نورتي
تحياتي

Zika said...

شقاوة شعب
جميل اوي مثال غزوات الرسول ده
تحياتي