Wednesday, July 9, 2008

أولياء الله الصالحين

من زمان اوي ودايما الافلام المصريه بتربط التدين والالتزام بزيارة اولياء الله الصالحين .. والتعلق بيهم والتملق فيهم
واظن ان اي واحد عاقل او حتي مجنون هيعرف ان ده حرام
اه حرام
والله حرام
بطلوا جهل بقي وتخلف فضحتونا
اللي كبر الموضوع في دماغي فيلم حسن ومرقص .وبالمناسبه الفيلم هايل بجد ومش مبتذل
المهم ان فيه مشهد في الفيلم لعمر الشريف الي المفروض انه مسلم بس عامل نفسه مسيحي لما بيقعد علي قهوة الفيشاوي مع عادل امام اللي هو المفروض انه مسيحي بس عامل نفسه مسلم
وهم قاعدين علي القهوه ومن مظاهر انه بيحن لدينه
ايه بقي مظهر التدين
انه راح ضريح سيدنا الحسين اللي موجود في نفس الحي اللي فيه القهوه عشان يصلي ولا يقرا الفاتحه
هو يعني الفاتحه ما تتقريش غير في المسجد ده بعينه
يا حلااوه
طب ما كان قام صلي ركعتين في اي مسجد من المساجد اللي موجوده
هيعملوا ايه يعني سيدنا الحسين
هاتولي ايه ولا حديث بيقول ان سيدنا الحسين وسيدنا علي والسيده نفيسه والسيده مريم والسيده زينب وكل الناس الصالحين دول بيستجيبوا لدعواتهم
اشحال ربنا قال ماتحلفوش وتقولوا ( والنبي) وقال ان ده فيه شرك بالله
والنبي ده افضل الخلق
واحب الخلق الي ربنا
يعني حرام
وجهل
وتخلف
وتفاهه لما نسيب التعلق بربنا ونروح نتعلق بناس مالهمش ذنب باللي بيحصل لانهم دلوقت اموات ليس الا
وبعدين ربنا مش بعيد
ربنا موجود جمبنا وجوانا في كي مكان
مش محتاجين وسيط بيننا وبينه
ربنا موجود وماطلبش من حد يكون وسيط بينه وبين عباده حتي النبي عليه الصلاة والسلام
يبقي ليه بقي مصممين علي اننا نبقي متخلفين
ونقول ان بركة فلان هتحل علينا
وده اقرب ما يكون الي عبادة الاصنام
يعني انا بدل ما ادعي واقول يارب
ادعي واقول يا سيدنا الحسين
ليه هو سيدنا الحسين اهم من ربنا ؟
اه هو من اسرة النبي وده شئ كويس
بس ده شئ كويس ليه مش لينا
تعلق الشيعه بناس معينه دون اخري
وتعلق الصوفيه بناس معينه دون اخري
وتعلق السنيه بناس معينه دون اخري
كل ده جهل والاولي اننا ندعي ربنا اللي سهل جدا انك توصله بسجده
وهو ربنا قال كده
قال فيما معناه ان اقرب ما يكون العبد الي في السجود
ارجوكم بلاش تخلف
التعلق باولياء الله الصالحين تخلف ولا بيودي ولا بيجيب
لان اولياء الله الصالحين اللي ممكن ناخدهم كامثله للالتزام ليس اكثر
لانهم لا يملكون لانفسهم ضررا او نفعا
عشان كله بامر الله مش بامر اي حد تاني

16 comments:

Desert cat said...

اولا الف مبروك على النجاح ولو انها جاية متاخرة شوية
بس انت بنفسك شوفت الحرب الشعواء
الدين الاسلامى واضح وصريح والقرآن بلغة عربية يقرأها الأعجمى فما بالك بالعربى
لكن من يتعلق باولياء الله الصالحين
وحىىى
ومدد يا سيدنا الحسين
دول مهاوييس ولا مؤاخذه
وليس على المهووس حرج
تحياتى

Zika said...

desert cat
الله يبارك فيكي يا قطة
ليس علي المهووس حرج
:)
تحياتي

كريم عاطف said...

مش عارف ليه باحس انها حاجة متعمدة، وليه دايما بيأكدوا على الفكرة دي من غير ما يقولوا انها غلط
لللأسف فيه كذا تدوينة فاتتتني لأني كنت مشغول
تحياتي ومبروك على النجاح

EGYPT EYES said...

أنا أشعر براحه عندما أكون في المساجد التي بها اضرحه لأل البيت وأخص بكلامي الشهيد العظيم الامام الحسين وانا لا اعبد الحسين ولا غيره من البشر ولكنه الحسين صاحب القيمه الدينيه والأنسانيه وزيارته ليست شرك بل موده لأل البيت والكثير ممن يقول مدد ياحسين لا يقصد بها المعنى الشركي أطلاقا على اي حال الله ارحم منا بهؤلاء لأنه يحاسب الناس بما في القلوب !!!
بالنسبه بقى للتعليق الأول اسمحلي اسجل أعتراضي عليه فلا يحق لأحد وصف ملايين الناس بالهوس إلا إذا كان هو نفسه مهووووووس ولكن طبعا من حق كل مدون أنه يعلق فقط من اجل التعليق
ألف مبروك تحياتي وتقديري

wade7 said...

الله يفتح عليك يابني

ايه العقل ده .. هو انت صحيح حرقت الفيلم :) بس كله في سبيل البوست الرائع دا يهون .. دا واجب المدونين يا جماعة انهم ينشروا الوعى عند الناس .. الموضوع مش تهليل و شتيمة .. لأ دا ميكروفون مفتوح تقول من خلاله الي انت عايزه

أهنيك يا زيكا

dina said...

ما هى دى المشكلة ... ان ساعات الاعلام بيوصل صورة غلط عن الدين و حتى بعيد عن الاعلام ساعات الناس بتنسى ربنا بحاجات هى بتخترعها..و سمعت مرة ان دى كانت بداية الشرك ان الناس كانت بتقدم قرابين لربنا و بدل ما تعبده لا قدست اوى القرابين دى و ادوها بقى اصنام و شرك و كلام من دا
مع ان زى ما قلت ربنا جوانا و مش بعيد ابداااااااااا
تحياتى

Zika said...

كريم عاطف
الله يبارك فيك يا كريم
ولا يهمك المهم انك موجود
وبالنسبه لموضوعنا .. غريب فعلا انهم ما ينوهوش ان النقطه دي غلط وكمان بيجيبوها علي انها دليل علي التدين

Zika said...

egypt eyes
بس يا عيون في حديث عن الرسول عليه الصلاة والسلام بيقول فيما معناه ان لا تشد الرحال الا لثلاث مساجد
مسجد الاقصي والمسجد الحرام ومسجدي هذا( مسجد الرسول يعني)
وبكده يبقي اتنفي من الاسلام زيارة مساجد معينه بالنيه دي اللي هي نية التقرب الي الله او ان ربنا موجود هناك اكتر او اقرب وده مش صحيح
وبعدين
حتية ان كلمة مدد يا حسين مش معناها شرك
اومال معناها ايه يا ريس ؟
وحتي لو مش معناها شرك طلب العون من غير الله
مين اولي انه يتطلب منه العون والمدد
غير ربنا سبحانه وتعالي
والله اعلم بما في القلوب
اما بالنسبة لتعليق قطة الصحراء
انا ماباعترضش تعليق حد طالما ما بيضرش حد
كل واحد حر يقول اللي هو عايزه يا باشا زي مانت كمان حر انك تقول اللي انت عاوزه دون خطوط حمرا لكن لا داعي لتوجيه كلام شخضي جارح
الله يبارم فيك
نورت يا عيون

Zika said...

wade7
الله يفتح عليك يا سيدي
ده بس من زوقك
لا يا باشا انا ماحرقتش الفيلم ولا حاجه
:))
ادخل الفيلم انت بس وعلي ضمانتي .. هيعجبك ان شاء الله
تحياتي
ونورت البلوج

Zika said...

dina
كلامك حقيقي يا دينا
في نقطه تانيه كمان
حتة الناس اللي بتندر بحاجات للناس دي
زي مثلا اللي يقول " دستة شمع يا ام هاشم لو حصل كذل "
وده طبعا مش محتاج تعليق مني علي حرمانيته
التضحيه بشئ تبقي لله وربنا حددها بحاجات معينه
تحياتي

EGYPT EYES said...

ايه يازيكا دا أنا بعتبرك أنسان متفتح هتلبس عباية الوهابيه وتتهم الناس بالشرك حب ال البيت مش جريمه ولا شرك دي مجرد موده لأل البيت خاصة الشهيد الحسين زي ماسبق وذكرت ثم أحنا عايشين في القرن الحادي والعشرين والناس تستطيع التفريق بين الحسين والله فلا تخشى عليهم الشرك !!!! ثم أنا عندما تتاح لي الفرصه وأكون في القاهره أذهب لزيارة الحسين فأنا أعتبره مقاتل ثوري مات من أجل العداله وأشعر بالرهبه وأنا في حضرته فهل تعتبرني مشرك أو مهوووس ؟
ثم الأهم هل من حق اي حد أنه يسب ملايين البشر فقط لأنهم مختلفين معه حتى لو أعتبرهم مشركين أمال فين الأحترام المتبادل وحرية العقيده اللي هي حق اساسي من حقوق الناس ولا أنت لبست العقال السعودي يازيكا وخلاص بقيت بتوزع الجنه والنار
ثم أنت مش شايف أن من الغريب أنك تعتبر أنتقاداتي لشحص واحد أمر شخصي وأنتقادات شخص لملايين من الناس لأنهم يختلفون معه أمر مسلم به !!!
بالمناسبه أنا ليا بوست قديم نشرته من أكتر من سنه فيه انتقادات عن الوهابيه وفي نفس الوقت فيه تعليق دافعت فيه عن المنتمين إليها عندما تجاوزت إحدى المعلقات وأتهمتهم بالكفر مثلما حدث عندك واتهمت المعلقه الصوفيين والشيعه ومحبين أل البيت بالهوس وكأنها قطه من صحراء السعوديه واوفقتها انت على اسائتها تقدر حضرتك تدخل تقرا البوست والتعليق عشان تتأكد ان الأمر غير شخصي على الأطلاق دي قناعاتي وأنا بدافع عنها يعني الأمر ش زي ماأنت فاهم انا اكبر من التفاهات دي ياصديقي ولو كنت لا تحب ات تقرأ أنتقادات على مواضيعك فأنا بعتذر عن التعليق بس كان واجب تنبهني عشان على الأقل لما الواحد يحس بالأسائه يكتفي بعدم التعليق
ولو ضايقتك تقدر تمسح التعليق

Zika said...

egypt eyes
بص يا ريس انا هرد عليك من تحت لفوق
اولا تعليقك ما ضايقنيش ومش همسحه لاني مش بمسح تعليقات من اي مدون
وانا برحب بالنقد علي كل شاكله وعلي كل لون وبحب النقد وبرحب بيه واهلا بيك ناقد في اي وقت
ثانيا ارجوك لا تتهمني بالوهابيه لاني بعيد عنها كل البعد ومش معني اني قلت حاجه الدين قالها ابقي وهابي وانت من اكتر الناس اللي بتدخل عندي المدونه والمفروض انك تبقي متاكد اني تفكيري بعيد كل البعد عن الفكر الوهابي ولك ان تقرا تدويناتي السابقه ( اللي المفروض انك قريتها) او حتي تدخل علي مدونة قطة الصحراء لتتاكد انها بعيده هي الاخري عن اي فكر وهابي
المهم
انا لم اتهمك بالشرك لا سمح الله وما قولتش الناس دي هتدخل النار او الجنه او حكمت عليهم باي حكم (اخروي) ليس من شاني الضعيف ان يفعله
ثالثا كلام قطة الصحراء كان عام ولم تذبه الي تجريح اي فرد موجود بيننا بشخصه زي مانت عملت معاها
نرجع لموضوعنا الاساسي
انا مانفتش حقك في الاعجاب بشخص معين او حبه او اي حاجه من دي لكن
لما بشوف ناس في وسط ازمتها تقول مدد يا حسين ولا مدد يا ام هاشم وتسيب ربنا
اللي اولي بالسؤال
ما بتشوفش الناس بترمي نفسها عالاضرحه ازاي وتبكي وتترجي بذل واستهانه اشخاص رحمهم الله وطلب العون منهم بدلا من البكاء لله ومن خشيته واللجوء اليه والتضرع اليه واسجل اعتراضي علي ده
ده ايه علاقته بالوهابيه ؟
فيه فرق كبير انك تحب شخص معين او تعجب بيه
وانك تلجأ اليه وتطلب منه المدد والعون
بدل ما تطلبه من ربنا
اللي قال ماحدش يتعلق بالنبي اللي هو النبي
يعني كلمة مدد يا رسول الله حرام فما بالك ان ده رسول الله صلي الله عليه وسلم
وبعدين الموضوع مش مقتصر علي ال البيت
يعني مثلا انا بسمع
مدد يا ابو العباس
مدد يا يا سيدي اسماعيل
مين الناس دول
ومين خلاهم الهه
هو اي حد صالح او كان ملتزم دينيا نحطه مكان ربنا
سواء بالنيه او باللفظ الخاطئ
المهم للمره التانيه والتاله والرابعه
انت مرحب بيك هنا وبرحب بنقدك وتعليقك في اي وقت
بس بدون التوجه لاي شخص حاضر بكلام يجرحه
تحياتي ليك يا ريس
ونورتني كالعاده

Empress appy said...

بص يا زيكس
طبعا دى موروثات مصريه وعند الشيعه كمان بجانب المصرين
اولا زيارة القبور كويسه مش وحشه بس للاتعاظ
ثانيا بقى الدعوة فى اى بيت من بيوت الله مقبوله لانه مسجد بس بنيه ان ده مسجد مش ضريح لان فلان اللى هيتوسط ليه او بركه ده
طبعا كلهم ناس فوق دماغنا ومعترفين بيهم
اكيد الحسين او السيده نفيسه او اسيده زينب
يعنى آل البيت
ولكن الناس بتعمل غلط يعنى زى ما قولت لك لو نيتك انك عادى داخل تصلى على انه مسجد عادى او وتدعى مش لاعتقادك فى حاجه تانهيه
غير كده انا بعذر الناس فى الموروثات اللى فى دماغهم لان دول منهم الناس الكبيرة الجده والجد والام الفلاحه الجاهله اللى متعرفش غير كده فهمتنى
بس حلو الموضوع يا زيكس مواضيعك بقت حلوة والله

Zika said...

appy
اه والله يا آبي دي كلها موروثات شعبيه غلط في غلط
من ايام الدوله الفاطمية
اللي يسامحهم بقي
:)
نورتي يا آبي

break said...

:)

حلوة طريقة عرضك للموضوع
انا بتعجبنى اراءك معظم الوقت
هيا اراءك بتتكتب كدة


انا عايزة ادخل فيلم حسن و مرقص ده

Zika said...

break
اولا شكرا علي الاطراء ده
:D
:$
الفيلم هيعجبك جدا فنيا
هو لذيذ
ادخليه وعلي ضمانتي