Sunday, July 6, 2008

تحديث

نجحت
من ممدوح عبد الحميد الي السيد وزير التعليم العالي والسادة دكاترة كلية تجارة جامعة القاهره
نشكركم علي حسن تعاونكم معنا ..
والي اللقاء في السنين القادمه
انا نجحت يا مينز
علامة تعجب ! علامة تعجب ! علامة تعجب !
----____----____----____----____
انغام
يا جماعه حد شاف منير مع محمود سعد في البيت بيتك ده كان لقاء من قريب جمعهم علي شاشة البيت بيتك
سيبكوا من محمود سعد
سيكوا من الملك
يا جماعه انا مكالمة انغام لمنير بسمعها كل يوم قبل ما انام
ماهو مش معقوله فيه واحده رقيقه كده .. وجميله كده وصوتها حلو كده واغانيها حلوه كده وهي كلها علي بعضها حلوه كده
ولو عايزين تحسوا بحالة ( الدلع ) الي ببقي فيها لما باسمع المكالمه دي
تعالوا اسمعوا المكالمه
----____----____----____----____
سكوت هنصور
بدا اليوم تصوير اولي اعمالي
ايون حصل
فيلم 40 دقيقه
( روائي قصير )
اخراج المخرج التونسي الشاب ( اللي معملش حاجه قبل كده ) : بهاء الحاج
قصة وسيناريو وحوار : ممدوح عبد الحميد ( زيكا ) اللي هو انا لا مؤاخذه
بطولة : محمود ابو النور
ممدوح عبدالحميد ( اللي هو انا بارضه ) ههههه
نسرين عبد الاله
عبد الله منذر
ولاء عبد الغني
الفيلم بتدور احداثه حول شابين واحد من اسره متوسطه والتاني من اسره غنيه منغمسين في شهواتهم لحد ما بيتقابل الاتنين وتحصل بينهم صراعات عنيفه ( تمثل الصراع الطبقي في مصر ) متمثلة في الصراع بين حسام عبد الواحد ( الشاب الغني ) واللي قام بدوره محمود ابو النور وبين احمد مرزوق ( شاب من اسرة متوسطه ) واللي بقوم انا بدوره وكل واحد فيهم بيستخدم سلطته في القضاء علي التاني
الفيلم عبارة عن ترميز لواقع الحياه المصريه متمثله في طبقة غنيه منحله وطبقه متوسطه منحله بارضه وطبقة اخري معدمه بتلجأ بنتهم مي اللي قامت بدورها ( نسرين عبد الاله ) واللي يتمثل دور فتاه بتلجأ الي السقوط نتيجة المعاناة اللي بتعيشها اهلها
ارجو ان الفيلم وهو عباره عن (اختبار ) للمخرج بهاء يحقق نجاح في دراسته ويبقي بداية مشوار طيب للجميع
وبباركله علي فوز الترجي علي النجم الساحلي في كاس تونس رغم انه بيشجع الصفاقسي
:D
----____----____----____----____
زيكا هيرقص يا ابو زيكا
سوسو هاتفتح يا ابو سوسو
ولله الحمد لقيت شغل يناسب امكانياتي وكمان بيتوافق مع قدراتي
يعني شغل مناسب حاجه انا بعرف اعملها واشتغلتها زمان ودلوقت كمان هاشتغلها كمحترف لتاني مره
ورغم ان المرتين من ورا اهلي الا اني سعيد اني رجعت تاني للحاجه اللي بحبها
((( مدرب رقص )))
اه مدرب رقص ... حد عنده اعتراض ...مش الرقص بتاع فيفي .. لأ الرقص التاني
( هاشتغل فنانه يا بابا)
ما شاء الله ما شاء الله ( هترقص ) ...اااه باليه يعني ؟
لأ الباليه ده رقص رجعي
( المشهد ده من مسرحية العيال كبرت هابقي احكيلكوا الموضوع ده بعدين ( المهم
انهم طلبوني تاني اني ادرب رقص
صلصا وهيب هوب وتانجو
لانهم مش لاقيين واحد بيتقن التلاته وبيحاسب علي التلاته بسعر واحد وكمان هادرب اربعه
ولد عنده 13 سنه
شاب عنده 25 سنه
فتاة ( حلوه حكاية فتاة دي ) سنها 19 سنه
واخيرا سيدة اعمال سنها 39 سنه
وطبعا طبعا
انا بقدملكوا اعتذار مقدما
لاني مش هاقدر اتابعكوا الا كل فتره وفتره وربنا يعلم انا هافتقدكوا قد ايه
لكن بروفات الفيلم وتصويره بالاضافه لموضوع الشغل
هياخد معظم وقتي
كان معكم من امام مكتب عبده مش فاضي
زيكاااا مش فاضي

10 comments:

Empress appy said...

لووووووووووووووووووولى مبروك يا زيكس انما نجحت ازاى دى بلد كوسه صحيح ههههههههههه
لا بجدفرحت لك ومقرتش بقيت البوست لان بصراحه خبر نجاحك سكر الف مبرووووووووووووووووك

Zika said...

appy
اهو بقي يا آبي الواحد عمل اللي عليه وانا الحمد لله ناجح علي الحركرك
انا عندي 3 مواد جبت فيهم درجة الزفت النجاح
وده للاسباب الاتيه
ماده اتخانقت مع المراقب
ماده اتخانقت مع الدكتور
ماده اتخانقت مع امي قبل ما انزل
:D:D
الله يبارك فيكي

مواطن مصرى نايم said...

ههههههههههههههه
مبروك يا زيكس
الف مبروك عقبالنا
و مبروك عالفيلم
لعلمك بقى انا بغيير
اه بغيييير
لما حد بيعاكس انغام قدامى
دى حبى حبى حبى
بجد حد تحفه بحبهااااااااا
جدا
اوعى تعاكسها قدامى بعد كده
انا نبهتك
و انت حر
هههههههههههه
تحياتى يا جميل
eslam

المنسى said...

سيبك إنت
الف الف الف مليون مبروووووووووووك

على النجاح
ده غنت إتنجدت ياراجل عقبالنا


ومبروك على الفيلم برضو

break said...
This comment has been removed by the author.
break said...

ايه دا كل دى اخبار مرة واحدة
انا اتحولت
اولا مبروووووووووووك على النتيجة
اهم خبر بصراحة فى الاخبار كلها

بالنسبة للفيلم ..يارب يكون فعلا بداية كويسة

بالنسبة لانغام
انا كنت لسة شايفاها قريب فى برنامج على روتانا موسيقى
كان اول مرة اسمع صوتها وهيا بتتكلم
كانت كهرمانة معايا
بجد مش ممكن الصوت ده
ما شاء الله
مكنتش متخيلة صوتها فى الكلام بالروعة دى
و الرقة دى
والشخصية فظييييييييييييييييييييييييييييييييييعة

ايه كمان
مش فاكرة كان فى اخبار تانية فى البوست؟

Zika said...

مواطن مصري نايم
الله يبارك فيك يا باشا
هههههههههه
ايه ده ايه ده هنقطع علي بعض ولا ايه
انغام دي خطيبتي علي فكره
:P
ماليش دعوه انا اللي اللي المفروض اقولك ماتعاكسهاش
هههههههههههه
نورت يا اسلام

Zika said...

المنسي
الف الف الف مليون الله يبارك فيك يا منسي
ربنا يخليك يا باشا انا وانت عند منجد واحد
:D:D

Zika said...

break
الله يبارك فيكي وعقبالك وعقبال السته كلكوا لما نسمع خبر نجاحكوا كده ان شاء الله
وهعلي فكره ليا عندكوا اتنين بيبسي من المرتين اللي فاتوا رغم اني مش فاكرر بس المهم ياريت تجيبوا اللي عليكوا :D
اه والله مش كفاية صوتها وهي بتغني لا وكمان صوتها وهي بتتكلم
اييييييييييييه
دنيا
:D
اه فيه خبر كمان بتاع الرقص
:D

Layla said...

مبروك ...الف مبروك

بس مش عارف ابارك لك على ايه الاول...بس ربنا يوفقك بجد..انت تستاهل كل خير
:)))