سبع سبعاتي

التاج ده لبسته من عند الناس بتوع صيدله

سبع حاجات نفسي اعملهم

1- نفسي ابقي احسن مدرب رقص في مصر

2- نفسي اخرج فيلم اكون انا اللي كاتب السيناريو بتاعه

3- امثل مع يوسف شاهين .. ده لو لسه فيه نفس يعني

4- اخلص من الكليه الزفت دي .... كلية تجارة لا مؤاخذه

5- انزل ديوان فيه اشعار من اللي كاتبها

6- نفسي الزمين يلف وارجع بضهري سنتين لورا ومحدش يسال ليه

7- نفسي مصر تبقي محترمه

سبع حاجات ماعرفتش اعملهم

1- ارضي ابويا وامي

2- ادخل كلية اعلام جامعة القاهره

3- امشي في الشارع وماعملش حادثه

4- احافظ علي نفسي من الاصابات

5- ماعرفتش ابقي بطل اوليمبي زي ما كنت طول عمري بحلم

6- اعيط .. للاسف عمري ما عيط ومش بعرف اعيط

7- اكدب .. مابعرفش اكدب بارضه وعمري ما كدبت رغم ان نفسي اكدب مره في حياتي عشان انقذ نفسي من مشاكل بحط نفسي فيها بسبب صراحتي الغبيه

سبع حاجات باقولهم دايما

1- حصل : ودي تعبير يدل علي التهكم

2- act like a man yad : ودي بتحث علي التشجيع ودايما بقولها في الجيم

3- اامين : ودي بتدل علي الموافقه

4- احا : ودي بتدل علي الاعتراض

5- يا راااجل : دي بتدل علي اني مش مصدق وبتتقال للنوعين سواء ذكر او انثي

6- let's do it : ودي بتدل علي التحمس في فعل شئ ما

7- قدر محصلش : ودي ملهاش معني بس بقولها علي سبيل التهييس

سبع مشكلات ممكن الفلوس تحلهم

1- انتج فيلم

2- اشتري عربيه نيو بيتتلز كوبيه كابورليه .. وعلي فكره مش غاليه اوي يعني عشان تعرفوا ان انا متواضع

3- افتح كلاس لتعليم الرقص

hip hop - salsa - tango - break dance ..

4- اسافر اتعالج من الاصابات اللي لحقت بيا مؤخرا وممكن تضيعلي مستقبلي فعلا

5- اشتري شركة ميكس شوكولاته

6- اتبرع للاهلي عشان يبني الاستاد بتاعه ههههه

7- واتبرع لمستشفي السرطان بارضه .. العيال دي محتاجه مساعده فعلا مش هزار

سبع اماكن بحبها

1- اسكندريه

2- المكان اللي بدرب فيه رقص

3- البلاتوه اللي بصور فيه الفيلم

4- قهوة البورصه

5- بيتنا

6- كافيه في ميدان لبنان اسمه تكساس

7 - المانيا .. بلد الاحلام

سبع اشخاص بحبهم غير اهلي

1- جزره ودي اخت دينا الله يرحمها ودينا دي كانت صاحبتي بقي ربنا يرزقها الجنه ان شاء الله

2- سلمي ودي اخت رنا الله يرحمها ورنا دي كانت صاحبتي بارضه ربنا بقي يرزقها الجنه ان شاء الله ( وعشان كده مش بفكر في الارتباط دلوقت حفاظا علي نسبة الوفيات بين البنات )

3- احمد عبد الحليم صاحب عمري

4- هشام ابن خالتي ووصاحبي وحبيبي وكفاءه

5-سامح . وده اقرب الناس ليا

6- بهاء الحاج .. صاحبي ومخرج الفيلم اللي شغال فيه دلوقتي

7- احمد ذكي ... الله يرحمه

سبع حاجات بحبهم

1- بحب اكتب زي عينيا

2- الرقص

3- التمثيل

4- القعده مع صحابي

5- النت والمدونات

6- بحب العب pro evalution soccer .. دي لعبة كمبيوتر

7- بحب متابعة اخبار السياسيين والشعرا واشعارهم وكده

سبع مدونات بافتحهم اول ما ادخل اونلاين

هم كتير بس اول سبعه يبقوا

1- بتوع صيدله والنور قطع

2- قطة الصحراء

3- كلو ماشي

4- آبي

5- ادم

6- عيون مصريه

7- الاغلبيه الصامته

ايه التاج ابن الطويله ده

الحمد لله خلصت

the end

نشاط هيستيري

قربت اخلص تصوير الفيلم الحمد لله ومعظم مشاهدي قاربت علي الانتهاء

رغم ان الفيلم كله هيخلص 20/8

ومحدش يسال ازاي

والله المخرج مخه حلو جدا

تحيا تونس واللي بيجيلنا منها

مبروك يا بهاء علي نجاحك في الفيلم ده

وانا بقولك مبروك من دلوقت لاني عارف ان الفيلم هينجح في المهرجان اللي معمول الفيلم عشانه

وبالمناسبه

ياريت اي حد عنده واحده يعرفها .. صوت نسائي من نوعيه

نهال نبيل

او ريهام عبد الحكيم

يبعتلي عالايميل فورا

محتاجين صوت مميز يغني معانا اغنية الفيلم اللي هي بتعتبر جزء من الموسيقي التصويريه

فلازم يكون فيه صوت جميل

يكون اهم من الموسيقي نفسها

عندي نشاط هيستيري في الكتابه اليومين دول

عايز اكتب سبعين بوست في بعض واحتمال اصلا اكتب بوست بعد ده بكام ساعه كده

انتظرونا

مصر وايران

حاجه غريبه

مين المستفيد في وجود خلاف وهمي بين مصر وايران ؟

واذا كانت الحكومه وبعض الجهلاء معترضين علي فيلم بيوضح موقف الايرانيين من السادات

ليه ما حدش اعتبرنا معندناش دم و بلاوينا الكتير اوي في نقد المصريين الدائم لآية الله الخميني اللي هو قائد الثوره الاسلاميه الايرانيه

هو يعني الخميني كوخه والسادات هو اللي صح الصح ؟

انا متهيالي ان دي تناكه مصريه فارغه

وابتكار خلاف مصري ايراني في هذا التوقيت لعبه مكشوفه اوي وغبيه جدا ومايصحش نبقي دلاديل كده ونمشي ورا كلام اي حد

هل الحكومه مع الناس بالغباء ده

ولا هم بيستعبطوا ؟

كلام في الكوره

هدد الاتحاد الإيراني لكرة القدم بتقديم شكوى إلى الاتحاد الدولي (فيفا) ضد الاتحاد المصري إذا ألغت المباراة الودية بين البلدين لأسباب سياسية.

هاني سعيد من حق الزمالك

الحضري من حق سيون

عمرو زكي ما يسافرش ويفضل في الزمالك

حسني من حق الاسماعيلي

احاااااااا ماعرفتكش انا كده بقي

كل اللخبطه دي في الكوره ايوه مش في مجال تاني

مش في السياسه مش في الفن مش في الادب .. طبعا انا عارف ان معظم الناس مش متابعه الرياضه عشان كده اللي مش عارف حاجه يقولي وانا هشرحله

بس انا مستغرب من حاجه

انا عايز اعرف اتحاد الكوره مقضيها ايه ؟

عقود .. ولا رغبات لاعيبه

لو عقود يبقي حسني والحضري من حق الاهلي

لو رغبات لاعيبه يبقي هاني سعيد في الاهلي وعمرو زكي بره والحضري بره

ولا ده حصل ولا ده حصل

ولا هو التعريس في الكوره كمان

ويا تري لو اللاعب غير رغبته نعمل قرعه

يعني نرف بريزه ونقوله الرغبه الاولانيه الملك والرغبه التانيه الكتابه وعلي حسب ما تيجي ولا ايه مش فاهم

وليه الغاء ماتش مصر وايران الودي

كل ده عشان قالوا وجهة نظرهم في السادات

طب ما 3/4 المصريين مقتنعين تماما بان السادات زيه زي غيره ولا هم فاكرين ان الشعب المصري بيحب السادات .. اظن انهم يبقوا غلطانين

ثم ليه الربط بين السياسه والكوره

ولو الموضوع وصل للفيفا ( الفيفا دي اللي هي الاتحاد الدولي لكرة القدم عشان ماحدش يفهم غلط ) يبقي وقعتهم مهببه

وبصراحه بقي يارب تبقي وقعتهم مهببه

* عايز اضيف حاجه بره الموضوع ده خالص

البوم عمرو مصطفي فيه مزيكا حلوه جدا

ماتركزش مع الكلام ولا صوت عمرو مصطفي اسمع التوزيع .. هايل بصراحه

عزيزي بن لادن

عزيزي بن لادن

بسم الله الرحمن الرحيم

ثم

بسم كل روح ازهقتها بسم الله وبسم الدفاع عنه

وكل من آمن برسائل الاديان منك براء

بسم ارواح الاطفال التي ذهبت فداء لعقيدتك

بسم كل الابرياء الذين اهدرت دمائهم سواء مسلمين او غير مسلمين

مؤمنين بوجود الله او غير مؤمنين

باسم كل مسلم تعرض للاضطهاد بسبب تشويهكل صورتهم جميعا

السلام رسالة الله في الارض التي قتلت السلام فيها

لا عليك ولا قريبا منك

اما بعد

تبا لك

فلتذهب الي الجحيم بخطوات ثابته لا متردد ولا خائف ولا تحوم حولك الافكار

الي الجحيم انت وكل من ساعدك يوما ما

اعدائك اليوم الذين كانوا اصدقائك بقربك وانت تقتل المسلمين من اهلك ودينك ودمك

الان يا عزيزي باعوك ويبحثون عنك في الارض كلها من شرقها وغربها لقتلك

والنيل باسمك الذي كانوا يتفاخرون به بينهم

عزيزي بن لادن

انقل اليك لعنات كل من آذيته يوما ما سواء بالقتل او بالتشريد

فانا لا اجد فرقا واحدا بينك وبين باراك او شارون السفاح او بوش الغبي

كلكم ستذهبون الي الجحيم يوما ما

انتظره بفارغ الصبر

عزيزي بن لادن

لقد سئمت استمرارك في جعل نفسك اميرا علينا نحن المسلمون في مشارق الارض ومغاربها

ولطالما سئمت من لعنك لامريكا رغم انها الوحيده التي وقفت بجانبك وساندتك وانت تقتل الجميع

والان

هي من تبحث عن راسك

لا اعرف من ولاك علينا اميرا ومن خدعك واوهمك انك ستدخل الجنه

ولا اعرف كيف قد يرحمك الله يوما

ولا اعرف كيف قد يغفر لك ذنوبك

ربما يغفر ذنوبي انا المخطئ دائما

ولكن

انت

؟؟؟

لا اظن ذلك

الخمر خطيئة تغتفر يا حقير اما قتل النفس فلا اعرف لها مغفرة

لا استطيع ان اتخيل ان يرضي الله عن كل هذا

قتل الالاف

تشريد الملايين

تشويه صورة المسلمين

هل تعتقد ان الله بعزته وجلاله يرضي ان يحكم غيره هذه الارض كما تفعل انت

هل تعتقد ان الله يرضي بان تكون انت خليفته في الارض

هل تصلي الصلوات الخمس ؟

هل تقرأ القران

هل حاربت اعداء الاسلام .... اذن من هم اعداء الاسلام ؟

اهالي الضحايا الذين قتلتهم يلعنون اسمك كل صباح

كل طفل يستيقظ يوما ولا يجد ابيه

كل زوجة فقدت زوجها

كل ام فقدت ابنها

كل دمعة عين كانت عليك لعنة

وعقاب

من الله عليك

الم تشعر بكل هذا بعد

كيف تغمض عيناك يا رجل

الم تسمع يوما ان الرسول امر بعدم قتل الابرياء

لماذا ترد علي قتل الابرياء من العرب بقتل الابرياء من غيرهم رغم ان هذا يخالف الدين الذي تتدعي انك تدافع عنه

عزيزي بن لادن

لماذا لم ترحم الجميع ؟

لماذا ؟

لماذا لم ترحم الاطفال الذين تشردوا ؟

الا تري معي انك بالغت في اقناع نفسك بانك الرسول القادم من السماء لانقاذ المسلمين

الا تري انك ازدت الطين بله

الا تري معي انك ساهمت وبشكل فعال في تشريد المسلمين في كل انحاء الارض

الا تري معي ان احوال المسلمين منذ ظهورك تزداد سوءا يوما بعد يوم

عزيزي بن لادن

فلتذهب الي الجحيم انت وكل من عاونك يوما ما وكل من يعاونك الان

فلتذهب الي لعنة الله بلا رجعة

لغة السلام هي اللغة التي تحدث بها الله منذ ان خلقنا علي هذه الارض الي اليوم الذي سنقف جميعا امامه وليجاسب كل منا علي ما فعله في دنياه

ارجو ان تتذكر هذا اليوم

الذي تقف فيه امام الله .

ماذا ستقول له

عندما يسالك عن الدم الذي اهدرته

عن الفقر الذي سببته

عن الخراب الذي حل علي عباده المؤمنين بسبب راسك

عزيزي بن لادن

كم اتمني ان تقرأ هذا يوما ما

فهذا كل ما بداخلي اليك

عزيزي بن لادن

الي الجحيم حيث لا اراك

أولياء الله الصالحين

من زمان اوي ودايما الافلام المصريه بتربط التدين والالتزام بزيارة اولياء الله الصالحين .. والتعلق بيهم والتملق فيهم

واظن ان اي واحد عاقل او حتي مجنون هيعرف ان ده حرام

اه حرام

والله حرام

بطلوا جهل بقي وتخلف فضحتونا

اللي كبر الموضوع في دماغي فيلم حسن ومرقص .وبالمناسبه الفيلم هايل بجد ومش مبتذل

المهم ان فيه مشهد في الفيلم لعمر الشريف الي المفروض انه مسلم بس عامل نفسه مسيحي لما بيقعد علي قهوة الفيشاوي مع عادل امام اللي هو المفروض انه مسيحي بس عامل نفسه مسلم

وهم قاعدين علي القهوه ومن مظاهر انه بيحن لدينه

ايه بقي مظهر التدين

انه راح ضريح سيدنا الحسين اللي موجود في نفس الحي اللي فيه القهوه عشان يصلي ولا يقرا الفاتحه

هو يعني الفاتحه ما تتقريش غير في المسجد ده بعينه

يا حلااوه

طب ما كان قام صلي ركعتين في اي مسجد من المساجد اللي موجوده

هيعملوا ايه يعني سيدنا الحسين

هاتولي ايه ولا حديث بيقول ان سيدنا الحسين وسيدنا علي والسيده نفيسه والسيده مريم والسيده زينب وكل الناس الصالحين دول بيستجيبوا لدعواتهم

اشحال ربنا قال ماتحلفوش وتقولوا ( والنبي) وقال ان ده فيه شرك بالله

والنبي ده افضل الخلق

واحب الخلق الي ربنا

يعني حرام

وجهل

وتخلف

وتفاهه لما نسيب التعلق بربنا ونروح نتعلق بناس مالهمش ذنب باللي بيحصل لانهم دلوقت اموات ليس الا

وبعدين ربنا مش بعيد

ربنا موجود جمبنا وجوانا في كي مكان

مش محتاجين وسيط بيننا وبينه

ربنا موجود وماطلبش من حد يكون وسيط بينه وبين عباده حتي النبي عليه الصلاة والسلام

يبقي ليه بقي مصممين علي اننا نبقي متخلفين

ونقول ان بركة فلان هتحل علينا

وده اقرب ما يكون الي عبادة الاصنام

يعني انا بدل ما ادعي واقول يارب

ادعي واقول يا سيدنا الحسين

ليه هو سيدنا الحسين اهم من ربنا ؟

اه هو من اسرة النبي وده شئ كويس

بس ده شئ كويس ليه مش لينا

تعلق الشيعه بناس معينه دون اخري

وتعلق الصوفيه بناس معينه دون اخري

وتعلق السنيه بناس معينه دون اخري

كل ده جهل والاولي اننا ندعي ربنا اللي سهل جدا انك توصله بسجده

وهو ربنا قال كده

قال فيما معناه ان اقرب ما يكون العبد الي في السجود

ارجوكم بلاش تخلف

التعلق باولياء الله الصالحين تخلف ولا بيودي ولا بيجيب

لان اولياء الله الصالحين اللي ممكن ناخدهم كامثله للالتزام ليس اكثر

لانهم لا يملكون لانفسهم ضررا او نفعا

عشان كله بامر الله مش بامر اي حد تاني

تحديث

نجحت

من ممدوح عبد الحميد الي السيد وزير التعليم العالي والسادة دكاترة كلية تجارة جامعة القاهره

نشكركم علي حسن تعاونكم معنا ..

والي اللقاء في السنين القادمه

انا نجحت يا مينز

علامة تعجب ! علامة تعجب ! علامة تعجب !

----____----____----____----____

انغام

يا جماعه حد شاف منير مع محمود سعد في البيت بيتك ده كان لقاء من قريب جمعهم علي شاشة البيت بيتك

سيبكوا من محمود سعد

سيكوا من الملك

يا جماعه انا مكالمة انغام لمنير بسمعها كل يوم قبل ما انام

ماهو مش معقوله فيه واحده رقيقه كده .. وجميله كده وصوتها حلو كده واغانيها حلوه كده وهي كلها علي بعضها حلوه كده

ولو عايزين تحسوا بحالة ( الدلع ) الي ببقي فيها لما باسمع المكالمه دي

تعالوا اسمعوا المكالمه

هنا

----____----____----____----____

سكوت هنصور

بدا اليوم تصوير اولي اعمالي

ايون حصل

فيلم 40 دقيقه

( روائي قصير )

اخراج المخرج التونسي الشاب ( اللي معملش حاجه قبل كده ) : بهاء الحاج

قصة وسيناريو وحوار : ممدوح عبد الحميد ( زيكا ) اللي هو انا لا مؤاخذه

بطولة : محمود ابو النور

ممدوح عبدالحميد ( اللي هو انا بارضه ) ههههه

نسرين عبد الاله

عبد الله منذر

ولاء عبد الغني

الفيلم بتدور احداثه حول شابين واحد من اسره متوسطه والتاني من اسره غنيه منغمسين في شهواتهم لحد ما بيتقابل الاتنين وتحصل بينهم صراعات عنيفه ( تمثل الصراع الطبقي في مصر ) متمثلة في الصراع بين حسام عبد الواحد ( الشاب الغني ) واللي قام بدوره محمود ابو النور وبين احمد مرزوق ( شاب من اسرة متوسطه ) واللي بقوم انا بدوره وكل واحد فيهم بيستخدم سلطته في القضاء علي التاني

الفيلم عبارة عن ترميز لواقع الحياه المصريه متمثله في طبقة غنيه منحله وطبقه متوسطه منحله بارضه وطبقة اخري معدمه بتلجأ بنتهم مي اللي قامت بدورها ( نسرين عبد الاله ) واللي يتمثل دور فتاه بتلجأ الي السقوط نتيجة المعاناة اللي بتعيشها اهلها

ارجو ان الفيلم وهو عباره عن (اختبار ) للمخرج بهاء يحقق نجاح في دراسته ويبقي بداية مشوار طيب للجميع

وبباركله علي فوز الترجي علي النجم الساحلي في كاس تونس رغم انه بيشجع الصفاقسي

:D

----____----____----____----____

زيكا هيرقص يا ابو زيكا

سوسو هاتفتح يا ابو سوسو

ولله الحمد لقيت شغل يناسب امكانياتي وكمان بيتوافق مع قدراتي

يعني شغل مناسب حاجه انا بعرف اعملها واشتغلتها زمان ودلوقت كمان هاشتغلها كمحترف لتاني مره

ورغم ان المرتين من ورا اهلي الا اني سعيد اني رجعت تاني للحاجه اللي بحبها

((( مدرب رقص )))

اه مدرب رقص ... حد عنده اعتراض ...مش الرقص بتاع فيفي .. لأ الرقص التاني

( هاشتغل فنانه يا بابا)

ما شاء الله ما شاء الله ( هترقص ) ...اااه باليه يعني ؟

لأ الباليه ده رقص رجعي

( المشهد ده من مسرحية العيال كبرت هابقي احكيلكوا الموضوع ده بعدين ( المهم

انهم طلبوني تاني اني ادرب رقص

صلصا وهيب هوب وتانجو

لانهم مش لاقيين واحد بيتقن التلاته وبيحاسب علي التلاته بسعر واحد وكمان هادرب اربعه

ولد عنده 13 سنه

شاب عنده 25 سنه

فتاة ( حلوه حكاية فتاة دي ) سنها 19 سنه

واخيرا سيدة اعمال سنها 39 سنه

وطبعا طبعا

انا بقدملكوا اعتذار مقدما

لاني مش هاقدر اتابعكوا الا كل فتره وفتره وربنا يعلم انا هافتقدكوا قد ايه

لكن بروفات الفيلم وتصويره بالاضافه لموضوع الشغل

هياخد معظم وقتي

كان معكم من امام مكتب عبده مش فاضي

زيكاااا مش فاضي

انا واعوذ بالله من قوله انا

تحديث ولا مؤاخذه

المدونه ترحب بالبذائات طالما انها في سياق الموضوع بعيدا عن سب الاشخاص بصفتهم

يعني

( انا ما بتباسش بوس الا لو كان في سياق الدراما )

( اشتم براحتك بس ما تشتمش حد )

في الفتره الاخيره بدات اسمع كلام تقيل علي قلبي بيقول اني سلبي وماليش موقف وباحب ارضي جميع الاطراف

ونظرا لان ده مش حقيقي كان لازم اعمل البوست ده

واعلن مواقفي من شوية حاجات موجوده دلوقت علي الساحه

انا اعلن واقرر واشجب واندب واصوت وارردح واشخر وازعق باعلي صوت واحب ولاول مره علي الفضائيات وحصريا

وبعد ما مسحت تعليقات كتير بسس الجمله السخيفه بان انا سلبي

احب ازعق واقول

اني ضد تصدير الغاز لاسرائيل

انا ضد اي حركات سياسيه جديده

ضد اي عنف في المظاهرات

ضد التعميم علي اي شئ سواء المنقبات او المحجبات او الاخوان او المصريين او او المصريات او الطلبه او المعارضه او الصحافه او اي بتنجان مقليا كان او مشويا

بمعني اني ضد فكرة التعميم حرفيا

انا ضد الشذوذ الجنسي جملة وتفصيلا لانه ببساطه

" gay is not god way "

ومش معني اني ليا " معارف " مثليه سواء ذكور او اناث الا ان ده مايمنعش ان هم نفسهم عارفين موقفي من الشذوذ الجنسي

انا ضد ربط العلمانيه بالالحاد ماعنديش مش كله مع العلمانيه لكن اكيد عندي مشكله مع الالحاد وده لا يمنع احترامي ليهم

ضد فكرة الربط بين اليهوديه والصهيونيه

من حقي اكره الصهاينه

ومن حقي اقول ان مش كل يهودي اسرائيلي

وان مفيش مشكله بيننا وبين اليهود

الازمه والغل والحقد لازم تكون موجوده بيننا وبين الصهاينه مش اليهود

وباتمني عودة اليهود المصريين او اليهود اللي من اصل مصري لمصر

انا ضد فكرة ان فيه اضطهاد ضد المسيحيين في مصر

( الاضطهاد ضد المصريين)

ومفيش ظابط شرطه يعذب واحد عشان مسيحي .. واكتر الناس المسحولين في الاقسام مسلمين ويمكن ساعات امن الدوله بيخافوا يعملوا مشاكل طائفيه فبيضرطوا انهم ياكلوا المسلم افيين عشان ما يتقالش انهم بيضطهدوا الاقباط

واظن ان المصريين مش متدينين لدرجة انهم يبقي عندهم تعصب ديني

" واظن كمان ان " معظم " الناس اجبن من انهم يصارحوا بكراهيتهم لطائفه اخري او انهم يبدوا سبب لهذه الكراهيه "

وكل ده تعتيم حكومي علي المصايب اللي بتحصل في البلد

انا ضد اي تجمعات تدوينيه تحدد ايه اللي المفروض اقوله او لأ

انا اصلا بدون عشان ميبقاش عليا رقيب

انا ضد رقابة الداخليه والنقابه علي الافلام

لا رقابة علي الابداع

لا رقابة علي الفن

وضد الرقابه العمريه كمان

وفي نفس الوقت ضد افلام الهلس وعلي سبيل المثال لا الحصر ( السبكي واخوانه ) بمعني اني ضد الاسفاف عشان ما يتلككوش ويقولوا نعمل رقابه عشان نمنع الاسفاف

انا ضد الاخوان حتي يعلنوا موقفهم من السينما والفن والمسيحيين وحينها يا اما ابقي معاهم او ابقي مش معاهم زي مانا

انا ضد التحرش الجنسي .. عيب بقي اتكسفوا علي دمكوا

انا مع الزواج المبكر مع مراعاة الفروق العمريه

" يعني مش واحد عنده 60 سنه يتجوز واحده عندها 16 سنه ويقولي جواز مبكر "

انا قصدي بالزواج المبكر ان الاتنين يكونوا صغيرين

انا ضد برنامج الحقيقه واظن ان وائل الابراشي مش بيدافع عن مصر وبيدي فرصه اكبر للطائفيه انها تبدا تبقي موجده في مصر بالناس المعفنه اللي هو بيجيبهم في البرنامج

وعلي راسهم

الجدع اللي اسمه مايكل منير ده

وفي رايي المتواضع ان اقباط المهجر بيسترزقوا من الحوارات دي اوي

انا ضد الحكومه بكل افرادها وحاشيتها وضد التوريث في اي مجال في مصر

انا ضد الواسطه والمحسوبيه والجدعنه والهروله تجاه التهريج بدلا من النظام وده كلام مش جديد

النظام ثم النظام ثم النظام

وللحديث بقيه