Wednesday, March 18, 2009

يا ابو كف رقيق وصغير



ماكنتش بحب كارتون بكار , كنت بحس انه زياده اوي ان عيل عنده سبع سنين يدوخ مشرط ومابيعملش حاجه غلط وزي القشطه .. ده طفل يعني لازم يحط صباعه في الكهربا ويضرب ابوه بالقلم ويطلع يجري ومايعملش الواجب ويضرب صحابه .. معلش يعني ماحدش شاف بوجي وطمطم

فاكرين شخصية زيكا

احم احم

ايوه جدي الله يرحمه سماني زيكا تيمنا بالشخصيه دي

ماكانش حد يقدر يمد ايده علي كيس الشيبسي بتاعي

ويالهوي لو حد غلط وعلي صوته وانا قاعد .. ايه مافيش هدوء يا ولاد الل

هو الواحد مايعرفش يتفرج عالكارتون بهدوء في البيت ده ولا ايه

ماما : بس يا واد انت ماتعليش صوتك عيب

زيكا : واد ... ده انتي نهارك مش فايت .. امشي انجري علي اوضتك ياللا

ذكريات الطفوله

زمان وانا صغير كنت بحلم ابقي كبير زي هشام عباس

بس ماعرفش ليه كنت عايز ابقي كبير

يمكن عشان ماروحش المدرسه , ولو اني دلوقت بتمني ولو يوم من ايام المدرسه

انا فاكر اول شريط كاسيت اشتريته في حياتي , وكنت لسه ساعتها شاري ( الووكمان ) وكنت عاوز شريط اشتريه بنفسي

تشتري ايه يا واد يا زيكا

تشتري ايه

كان عندي ساعتها 8 سنين

قولت بس

مافيش غير البوم الفرحه

" والدنيا لو جارحه .. لونها لون فرحه , ماهو ايه بيغير عمر الواحد غييييير .. غير الفرحه"

اشتريت الفرحه وعجبني اوي , اكيد كان عندي 8 سنين ماكنتش فاهم اوي الالبوم بيتكلم عن ايه بس حبيت منير اوي

لما كان كارتون بكار بيشتغل في التليفزيون انا كنت ببقي مركز في الفطار بصراحه ( عشان انا لما باكل كل حواسي بتقف )

كنت بحب اوي اسمع الاغنيه

بكار بكار بكاااااار

من صغره وصغر سنه عارف معني انه من قلبه وروحه مصري

تاريخ ارضه بلاده بيجري جوه دمه

يطلع الكورال بقي والاطفال تشتغل

" من قلبه وروحه مصري والنيل جوه بيسري "

اصحابه كتير كتير قده قدهم طابور الصبح تضرب اجراس تلمهم

وموسيقي نشيد بلادي بيجري في دمهم

كنت دايما بعلي مع منير اوي في الحته دي

" وموسيقي نشيد بلادي بتجري في دمهم"

تمرين اوي وتاني وسؤال في عينيا تاني

يا بلادي انا امتي هاكبر , أطول النخل واقدر

واطوف من ورد توشكي واعملك عقد مرمر

ياااااااااااااااااااه

لسه لحد دلوقت بسال السؤال ده

يا بلادي انا متي هاكبر

وهاطول النخل واقدر

واطوف من ورد توشكي

واعملك عقد مرمر

ما تردي يا بلادي ولا اخرسيتي .. انا متي هاكبر

ولو يعني فيه نخل , امتي هاطوله وامتي هاقدر

ويا تري لما هاكبر هاندم بارضه اني كبرت وارجع ابقي عاوز بشده ارجع تاني عيل صغير

تشتغل الاغنيه تاني في وداني

الشمس عروسه جميله بتحب تلم العيله وبتعمل ميت هليله لما تشوف الحلوين

خطاويك السما حارساها هتمد الند معاها هتهدي هنستناها اومال هندلع مين؟

يا ابو كف رقيق وصغير

وعيون فنان محتار

يا ابو ضحكه وصوتها فقلبه

بيضوي الف نهار

زمان ايام الطفوله ماكنتش بخاف زي العيال الصغيره بالعكس انا فاكر مره عمي جاي يقولي عاووووووووووو

قلتله انت عبيط يا اونكل ولا ايه

لكن علي العكس دلوقت

بخاف من حاجات كتير اوي

بخاف جدا لا ييجي بكره ويطلع مش زي مانا كنت عايزه

وبخاف اكتر لما افكر يااه لو فعلا جه اليوم ده عكس مانا كنت عاوزه يا تري هيحصل ايه؟

عارفين مشكلة الناس اللي بتكتب شعر او بتحبه ايه؟

انك تصحي من النوم الساعه 5 الفجر وينزل عليك الوحي مره واحده وتقوم في عز احلاها نومه , عشان تكتب اللي جه في دماغك والمشكله انك ماتعرفش تنام تحس مثلا انك لو نمت ممكن تنسي وتقوم تكتب الكلمتين وتقول اكمل بكره

او يمكن ما تكملش

في يوم قبل مانام

قعدت افكر كده .. يا تري بكره في ايه؟

وعمال ادندن

يا بلادي انا متي هاكبر واطول النخل واقدر واطوف من ورد توشكي واعملك عقد مرمر

ولما نمت

صحيت الساعه خمسه الفجر وكتبت دي



يا نجوم الضلمه يا حابساني


جوه الليل والليل التاني


وجوه المواويل


يا حمامه يا طايره فوق عشي


يا تمشي الوقت يا اما امشي


ده انا ليلي طويل


انا خايف لا الليل ده يطول


ييجي غيره واعيشه من الاول


وانا صبري قليل


انا خايف بكره لا مايجيش


زي مانا راسمله


واحكي للناس وماتفهمنيش


وتقول اهو حظه ومقسومله

19 comments:

aMr saYed said...

فعلا جدك ده عنده حق يا زيكا بص بقا يا ابو كف رقيق وصغير
انا بضم صوتي لصوتك
يا بلادي انا امتى هكبر واطول النخل واقدر واطوف من ورد توشكى واعملك عقد مرمر

انا عكسك تماما انا اول واحد سمعتله شريط كامل وكل اما افتكره افتكر ايام اسكندرية هو محمد محي الدين ابو العز
شريط بعاتبك

كان جامد ساعتها كان عندي تقريبا 8 سنين ولسه معلم في دماغي لغاية دلوقتي المصيف ده

وبرده شريط احمر شفايف لمنير و سلف ودين لجورج وسوف كنت في مصيف برده كده بعيد عنك في جمصة مع ناس قرايبنا بس كان مصيف اصلي كانت هيصة يا معلم وده الي حصل فقيه حاجة قولتهالك زمان كده يجي من سنتين واحنا راجعين من الجامعة ساعت لما تيييييييت اكيد افتكرت

سلاموز

مواطن مصري said...

ههههه انا ب الرغم سني بس كنت بستنى أفتقرج بكار الله يرحم المخرجة بتاعت بكار

سارة نجاتى said...

و الله يا زيكا يا ريتنى كنت أعرفك

personally

أنا قريتك كويس
مش قريت اللى كتبه مش عاوزه ضلامه دماغ ما أنا مش بصمجية
قصدى قريت اللى وراه , حاسه بيك بطريقة مش طبيعية أنت اليومين دول مطقم معايا أصلك ههههه

و على فكرة أنا برده مش بحب كارتون بكار بس الأغنية روعة و متفقه معاك فى الجزء ده بالذات "يا بلادي انا امتي هاكبر , أطول النخل واقدر
واطوف من ورد توشكي واعملك عقد مرمر"

زيكا أنت ح تبقى حد كويس أوى , مش عشان مزاج اهلى أقولك كده بس هو ده مكانك الصح

Zika said...

عمرو تعلب
وماله بعاتبك حلو بارضه وانت عارفني بحب محي بارضك
احمر شفايف كان ليه ذكري حلوه معايا
كان اول مره اروح اسكندريه
والالبوم نزل ساعتها وكنت مشهيص نفسي اوي
احمر شفايف واسكندريه
يالهوي

Zika said...

مواطن مصري
الله يرحم مني ابو النصر بجد كانت ست عبقريه
اينعم ماكنتش بحب بكار ده
بس بارضه كفايه انها كانت السبب ف ي نزول الاغنيه دي

Zika said...

ساره نجاتي
مافيش ضلامة مخ انتي قولي وانا هافهم علي طول هههههههههههه
يا فندم من القلب للقلب
ياللا بقي نعمل دويتو
"تمرين اول وتاني وسؤال ف يعينينا تاني يا بلادي انا امتي هاكبير واطول النخل واقدر واقطف من ورد توشكي واعملك عقد مرمر"
:D:D:D:D:D
بصي نغني انا وانتي هنكسر الدنيا
هنقعد منير في بيته

*البت المشمشية *حلوة بس شقية * said...

واد انتا
مش قولتلك ميت مرة اتغطا وانتا نايم

قال كف رقيق وصغير قال
انا اللى عايزة اديك كف
حلو اوى جو الكارتون ده
وهو انتا من ايام شريط الدنيا لو فرحة
ده انتا قديم اوى
وسلمللى على جدو اوى

micheal said...

زمان وانا صغير كنت بحلم ابقي كبير زي هشام عباس


بس ماعرفش ليه كنت عايز ابقي كبير


يمكن عشان ماروحش المدرسه , ولو اني دلوقت بتمني ولو يوم من ايام المدرسه
الجملتين دول فكروني بنفسي جدا جدا..نفس الاحساس ونفس الشعور
أنت فنان يا زيكا بجد..أنا طبعا مقدرش أقيم كلامك من ناحية فنية لاني ماليش في الحوار بس بجد بيعجبني وبحس أنه بيدخل دماغي لما بقرالك حاجة +أني سمعت جدا عن موضوع الشعراء اللي بيقوموا 5 الفجر يخبطوا اللي جه في دماغهم ويكملوا نوم
:)
ربنا يكرمك يا فنان
تحياتي

dr.lecter said...

فرق شاسع بين الاغاني والاحلام وبين ارض الوااقع

اللي بتخلينا نكره البلد كل يوم

حبينا بلدنا مع بوجي وطمطم وبكار وكل زكريات الطفوله لكن شفنا وشها القبيح لما كبرنا

z!zOoOo said...

بص البوست من كتر ما هو واقعي

الناس حسيته قوي

لأني بحب الاغنيه جدا وبحب بكار بس مش كل أجزاءه

علشان كنت بحب براءته وعيشته البسيطه

لكن اول ما حسيت انهم شويه كمان وهيعملوا بكار ريلودد فضيتها سيره ونقلت علي سوبر هنيدي ههههههههههههههه

بقولك صحيح

شوفت حوار خمسه الصبح ده

بيحصلي كتير قوي

وغير حوار النوم ممكن ابقي مندمج مع حد في حوار تطق الفكره اتشتت شويه واكتب الفكره علي الموبايل علشان منساش
وساعات ابقي في الشارع وف مليون مكان ونداء الابداع يشتغل ههههههههههه

بس انا عايز تروق كده إن شاء الله هتكبر وتطول النخل يا سيدي بس ما تستعجلش

عارفين مشكلة الناس اللي بتكتب شعر او بتحبه ايه؟

لو نمت ممكن تنسي وتقوم تكتب الكلمتين وتقول اكمل بكره
او يمكن ما تكملش

فعلا هو ده كلام الناس العاقلين

بس تعرف ده تفسيره ايه ياد يا ابو
الزيك زي ما بيقولوا الفنون جنون

صحيح حلوه قوي القصيده ديه

روق كده يا نجم وكل شيء هيبقي زي الفل بإذن الله

في رعايه الله

Unknown said...

تصدق يا زيكا
رنة موبايلى هو المقطع دة من اغنية بكار
كل ما يرن واسمعها اقول انا لازم اشيلها عشان دة تعذيب ....بس مبشيلهاش
هعهعهعهعععععععععععع
صباح الماسوشية

اسماء عوني said...

عليك الاغنيه دي
انت مدي علي بكار اوي
بس انت مش كف رقيق ومش صغير
انت بقيت شحط دلوقت وبقيت راجل
يعني انت دلوقت نقدر نقول عليك مشرط يا زيكا

Zika said...

البت المشمشيه
بت انتي
مش قولتلك ميت مره حد بيشد الغطا من عليا

هو انتي يعني يا مشمشه مش بتحبي الكارتون وكده ده كلام بارضه
فيه مخلوق مش بيحب الكارتون

اه بالنسبه لجد
ممكن أأجرلك واحد خط يطخك وتروحي تسلمي بقي علي جدو وعلي تيته وعلي احمد زكي
:D::D:D

Zika said...

mike
ربنا يخليك يا استاذ
انت تقولي فنان وانا اقولك استاذ ههههههه
ونلبس طرابيش احنا الاتنين
سعيده
ههههههههههه

Zika said...

dr. lecter
ايوه بالظبط يا باشا هو البوست بيتكلم عن كده
الله ينور عليك
نورت يا دكتور

Zika said...

زيزووووو
ههههههههههه
حلوه بكار ريلودد دي
انا بعشق سوبر هنيدي ده
معجزه كارتونيه مصريه فعلا
هي الفنون جنون يا معلم هي

Zika said...

enjy
صباح شريف بالماسوشيه يا فندم
لا لا ماتشيليهاش
انا حاطط حتي حتي بتاعة منير

Zika said...

اسماء زفت عوني
انا مشرط بقي عاوزه حاجه
احترسي بقي يا رشيده يحسن هاجي اموتك

Anonymous said...

بسم الله الرحمن الرحيم

" يا بني لا تمشي في الأرض مرحا فانك لن تخرق الأرض ولن تطول الجبال طولا "

الإسراء 37

صدق الله العظيم

مش عايز أقول حاجة أكتر من كدة يا زيكا ,مفيش حاجة مالية عيني أبلغ من دة بصراحة...


بس معاك إن بكار خنيق طخن علي إنه عيل ,عجوز أوي علي إنه عيل عنده 8 سنين ,انا عندي اخ أصغر مني عنده 12 سنة مش 8 يعني و أهدي مني بـ70000 مرة في الشقاوة ولا الغليان و التخريب ولسة أهو مع ذلك كاسر دراعه من يومين و مطلعهم عليا الوان